TAK, Fajkonjtë e Lirisë së Kurdistanit, kanë marrë përsipër shpërthimin vdekjeprurës të së dielës së shkuar në kryeqytetin turk.
Hakmarrje për operacionet ushtarake turke kundër terrorit në juglindje të vendit, e ka quajtur TAK-u aktin terrorist të 13 marsit që la pas 37 të vdekur e qindra të plagosur.
Marrja e përgjegjësisë për sulmin është njoftuar përmes një deklarate në rrjetin elektronik, ndërsa e njëjta organizatë pati marrë përgjegjësinë dhe për një sulm tjetër të ngjashëm në shkurt në Ankara, prej të cilit mbetën të vdekur 29 persona.
TAK është një degë e PKK-së, me të cilën pretendon se është ndarë. Pas një periudhe të gjatë qetësie, PKK-ja i riaktivizoi në mesin e vitit të shkuar sulmet terroriste, e që prej asaj periudhe ka një përplasje të vazhdueshme mes saj dhe forcave turke të sigurisë. /tesheshi.com/
