Në Tajvan kanë nisur votimet për të zgjedhur presidentin e ri të vendit. Tsai Ing-wen, udhëheqësja e Partisë Demokratike Progresive, shihet si fituesja më e mundshme e këtyre zgjedhjeve, çka do ta bënte atë të parën femër presidente të vendit.
Amullia ekonomike, paktet tregtare me Kinën që nuk kanë arritur të kenë ndikim te njerëzit e thjeshtë në Tajvan, si dhe një parehati për ngrohjen e marrëdhënieve me Kinën, janë ato çka do t’i bëjnë votuesit të vendosin se kujt kandidat do t’ia japin votën.
Presidenti Ma Ying-jeou, që vjen nga radhët e Partisë Nacionaliste, me një qasje më miqësore ndaj Kinës, nuk mund të zgjidhet më pas tetë viteve në postin e lartë. Ai do të mbahet mend për takimin e tij historik me presidentin kinez Xi Jinping nëntorin e shkuar.
Tsai Ing-wen dhe partia e saj janë më të prirur për pavarësinë e vendit, ndonëse vetë kandidatja për presidente ka thënë se kërkon të ruajë gjendje aktuale të marrëdhënieve me Kinën, pa shkuar më tej.
Analistët politikë e shohin fitoren e saj të mundshme si një shkak për t’i destabilizuar sërish marrëdhëniet me Kinën. Autoritetet kineze e kanë përsëritur shpesh se do të përdorin forcën nëse Tajvani shpall zyrtarisht pavarësinë, ndërsa vendi vetëqeveriset aktualisht. /tesheshi.com/
