Saimir Tahiri e ka thënë troç se nuk pranon të gjykohet me pranga në duar. Në seancën e sotme po diskutohet heqja e imunitetit të tij me kërkesë nga prokurorët, pati një debat që nga termat juridikë kaloi në ato politikë, mes tij dhe deputetit demokrat Enkelejd Alibeaj.
Ky i fundit, i kujtoi Tahirit përbetimin e dhënë në daljen e parë në media pas publikimit të dosjes “Habilaj” me emrin e tij, se ishte i gatshëm të përballej me drejtësinë duke mos përfituar nga asnjë imunitet; e se po ashtu pse po i frikësohej shkuarjes në gjykatë teksa ishte i bindur në pafajshmëri.
Tahiri iu përgjigj se nuk do kishte gjasa që kjo të ndodhte me pranga në duar. Deputeti socialist tha se donte prova dhe vetëm prova, e se po të ishte për akuza, ai duhej të kishte shkuar më herët në burg, nga gjithë ajo çka ka thënë opozita për të, e jo thjesht nga përmendja e emrit të tij prej dy kriminelëve.
Më pas Tahiri iu drejtua Alibejat, duke i kujtuar atij që politikisht qëndron në krah të një vrasësi apo hajduti, dhe nisi të përmende Gërdecin, 21 Janarin apo abuzimin financiar të përfolur me Rrugën e Kombit. /tesheshi.com/
