Një administrim më i mirë i kufijve mes Shqipërisë dhe Italisë është cilësuar si pika më emergjente mbi të cilët kërkohet më shumë intensifkim. Ky fakt u diskutua gjatë një takimi mes ministrit të Punëve të Brendshme, Saimir Tahiri, dhe Prokurorit të Antimafias në Leçe të Italisë Cataldo Motta dhe zëvendësprokurorin e Republikës, Guglielmo Cataldi.
Gjatë takimit u vlerësua bashkëpunimi i deritanishëm mes autoriteteve ligjzbatuese në të dy vendet, si dhe nevoja e zgjerimit dhe intensifikimit të këtij bashkëpunimi.
“Kemi ardhur në Shqipëri sepse ka bashkëpunim, ndryshe nuk do të vinim”, tha gjatë takimit Prokurori Motta. Ai evidentoi në takim nevojën për një bashkëpunim mes palëve, përmes veprimeve hetimore të përbashkëta.
Ministri Tahiri u shpreh se Policia e Shtetit është e gatshme për çdo nismë të përbashkët për hetime kundër trafikut të drogës. Bashkëbiseduesit theksuan se prezenca e Policisë italiane, përmes misioneve të saj në Shqipëri, është një dëshmi e fortë e bashkëpunimit dhe garanci për transparencë. Palët nënvizuan gjithashtu se një kontroll efikas i kufijve kontribuon për të parandaluar paligjshmëritë. Ata theksuan mirëkuptimin mes Italisë e Shqipërisë për të përforcuar bashkëpunimin në sektorin e sigurisë dhe të luftës kundër drogës, për administrimin e kufijve, si dhe për të rritur aftësinë e forcave policore të të dy vendeve për këtë qëllim.
Gjatë ditës së sotme forcat e rendit në Itali kanë kryer katër operacione në zonën e San Foka e San Cataldo, në Pulia, në jug të vendit, ku u sekuesruan rreth 1 ton drogë dhe në pranga përfunduan 5 persona, 4 prej të cilëve ishin shqiptarë./tesheshi.com/
