Partia Demokratike dhe LSI kanë hartuar një raport prej 22 faqësh, në të cilin kërkohet pranimin e kërkesës së prokurorisë për hetimin dhe arrestimin e deputetit Saimir Tahiri. Drafti i përbashkët i partive opozitare është hartuar për seancën e së mërkurës ku do të votohet heqja ose jo e imunitetit të deputetit Saimir Tahiri, gjë që hap rrugën për një arrestim të mundshëm.
Dy partitë opozitare bëjnë një pasqyrim të zhvillimeve që nga arrestimi në Itali i Moisi Habilajt, për trafik narkotikësh e deri tek raporti 140 faqesh i përgjimeve ku të akuzuarit përmendnin dhe emrin e Sajmir Tahirit.
“4 vjet kishin zhvilluar qetesisht trafikun ndërkombëtar të drogës, për bisedat midis familjarëve Habilaj dhe anëtarëve të grupit të strukturuar kriminal, që dëshmonin për kontakte të shpeshta me deputetin Saimir Tahiri dhe për lidhje të ngushta me të, gjer tek dhënia e dhuratave dhe e shpërblimeve të paligjshme, për vehtën, familajrët dhe partinë politike të tij që t’i përdorte për zgjedhje, si pasojë e krijimit prej tij të mbështetjes dhe lehtësimit për trafikimin ndërkombëtar të narkotikëve”, thuhet në raport.
Sipas opozitës, vëllezërit Habilaj dhe bashkëpunëtorët e tyre kanë patur lidhje të ngushta me deputetin Saimir Tahiri dhe duke përfituar nga këto lidhje të ngushta dhe përmes shpërblimeve, kanë arritur të bëjnë të mundur, krijimin e kushteve për kultivimin në sasi të konsiderueshme të lëndës narkotike në Shqipëri, transportimin e tyre në mënyrë të organizuar me destinacion jashtë shtetit, me skafe, peshkarexha dhe automjete, nder te tjera makina Audi me targe AA003GB.
Gjithashtu opozita shprehet se Deputeti Saimir Tahiri ka siguruar paprekshmërinë e grupit të strukturuar kriminal.
Opozita kërkon që Kuvendi, në cilësinë e pushtetit legjislativ të kryejë detyrën. Sipas dy partive, Kuvendi në këtë lloj procedure ka vetëm një detyrë: të sigurojë që deputeti në procedurë të mos jetë peng i përdorimit abuziv politiko-partiak për shkak të veprimtarisë së tij parlamentare. /tesheshi.com/
