Një ditë para 7 vjetorit të tragjedisë së 21 janarit ku u vranë katër persona përpara sheshit të Kryeministrisë, ministri i Brendshëm, Saimir Tahiri deklaron se Drejtësia nuk është vendosur në vend.
Këto komente, Tahiri i bëri gjatë një aktiviteti me forcat speciale, FNSH-në dhe RENEA-n në kuadër të miratimit të ligjit për sigurimin shëndetësor.
“Ka shumë për të bërë, drejtësia për 21 janarin nuk është vendosur në vend. Është një nga çështjet më themelore ku dallohen shumë qartë dy gjëra. E para krimi shtetëror që ka mbetur i pandëshkuar, e dyta nevoja për të reformuar sistemin e drejtësisë duke filluar me ata gjyqtarë që kanë sanksionuar një krim të dytë lidhur me ata që u vranë në 21 janar”, u shpreh Tahiri.
Ministri Tahiri tha se pavarësisht dëmshpërblimeve, nuk ka pasur drejtësi. “Kjo nuk bën drejtësi. Kjo lehtëson dhimbjen e familjeve që kanë humbur të afërmit e tyre të vrarë nga shteti më 21 janar. Ndërkohë, ne kemi marrë masa që kjo të mos përsëritet më. Kemi miratuar një ligj për përdorimin e armëve ku sanksionohet se kur ndodh që shteti të përdor armët”, tha ai.
Ministri i Brendshëm akuzoi edhe gjyqtarët për mos dënimin e atyre sipas tij, që dhanë urdhër për të ekzekutuar dhe të atyre që zbatuan këto urdhra, ndërsa shtoi se janë pikërisht këta gjyqtarë që dalin kundër reformës në drejtësi. “Ne jemi angazhuar që drejtësia për 21 janarin të bëhet”, përfundoi ai. /tesheshi.com/
