Saimir Tahiri ka mbetur sërish në arrest shtëpiak pas një shqyrtimi më të hollësishëm të Gjykatës së Krimeve të Rënda.
Pas seancës, avokati i tij Maks Haxhia u shpreh se do të apelojë vendimin por shtoi se prokuroria nuk paraqiti asnjë provë të re. Madje avokati i Tahirit sulmoi prokurorin Hajdarmataj i shkarkuar vetëm pak ditë më parë nga drejtimi i Prokurorisë së Krimeve të Rënda
Dy prokurorët e çështjes, Vladimir Mara dhe Besim Hajdarmataj thanë se kjo masë sigurie është e domosdoshme pasi rrezikon prishja e provave.
Maks Haxhiaj e ktheu këtë kërkesë në anektodë: “Prokurori tha se duhet të arrestohet zoti Tahiri pasi mund të ndërhyjë në zyrën time duke prishur provat. E dimë klienti im është një supermen që fluturon…”
Haxhia shprehu bindjen se ky vendim do të prishet nga “Në gjithë materialin e dosjes së paraqitur nga prokuroria nuk kishte asnjë provë të re që të implikonte me dyshime të arsyeshme të bazuara në prova implikimin e Tahirit në ndonjë vepër penale, përfshirë dhe ato të akuzës”, tha avokati i Tahirit.
Sipas tij të gjithë ata që kanë qarkulluar në media si prova nuk ekzistojnë.
Në seancën me dyer të mbyllura, Haxhia deklaroi se me të njëjtat prova prokuroria kërkoi konfiskimin e pasaportës së Saimir Tahirit. Sipas tij, letër-porositë e ardhura së fundmi nga Greqia dhe Italia nuk e fajësojnë direkt ish-ministrin e Brendshëm.
Besim Hajdarmataj ka deklaruar se disa prova janë prishur dhe rrezikon mundësia të prishen dhe prova të tjera. Hajdarmataj iu referua dëshmisë së një personi që ka në pronësi një mjet të përdorur nga zoti Tahiri në Greqi. Ai tha se ky shtetas pasi është marrë në pyetje nga prokuroria ka pasur një kontakt me ish-ministrin.
Lidhur me këtë, Tahiri tha se vërtet ka pasur një kontakt me këtë person, por thjesht e ka falenderuar dhe i ka kërkuar ndjesë që është bërë objekt i marrjes në pyetje nga organi i akuzës.
Prokurori Hajdarmataj përmedi gjithashtu faktin se do bëjë apelim në Gjykatën e Apelit, duke kërkuar vendosjen e arrestit me burg për Tahirin. /tesheshi.com
