Ish-ministri i Brendshëm Saimir Tahiri, pas lënies së detyrës duket se ka ndjekur shembullin e një prej kundërshtarëve që ka anatemuar më së shumti në jetën e vet politike, Sali Berishës. Ai është angazhuar me anë të postimeve në rrjetet sociale për të dhënë qëndrimet e tij për çështje të ndryshme të aktualitetit.
Këtë radhë, me anë të një postimi në Facebook, Tahiri i është “kthyer” LSI-së, për të cilën thotë se është në koalicion me socialistët por nuk ngurron t’i shkelë syrin partisë Demokratike.
“Përtej të gjithë debateve të brendshme apo goditjeve tendencioze në publik, LSI ka mbështetur reformat dhe ka bashkëpunuar me PS pa shkelur asnjëherë marrëveshjen me 1 milion votuesit tanë. Por, nuk mund të mos them sot, si udhëheqës politik i Partisë Socialiste për Qarkun e Tiranës, se prononcimet publike për mospjesëmarrje në zgjedhjet e Kavajës apo për vetë procesin zgjedhor në Kavajë që na qenka, sipas LSI, farsë pa opozitën, janë destruktive dhe nuk ndihmojnë askënd. Aq më pak kthimin e opozitës në normalitetin demokratik. Sipas LSI ne duhet të anullojmë zgjedhjet në Kavajë meqë nuk bëhen në çadër? Duhet të deklarojmë edhe ne, Partia Socialiste, mospjesëmarrjen meqë edhe LSI mendoka si PD? Apo mos duhet të ndjehemi ne fajtorë për “farsën” imagjinare të pjesëmarrjes, ndërkohë që farsa reale është mospjesëmarrja?”, shkruan Tahiri.
Tahiri përfundon duke thënë se me ose pa LSI-në, socialistët do të o respektojnë të drejtën sovrane të popullit shqiptar për të zgjedhur ofertën më të mirë. “Ndaj, edhe sikur vetëm fare pa asnjë parti tjetër, ne do hyjmë në zgjedhje e do fitojmë”, shton Tahiri. /tesheshi.com/
