Ministri i Brendshëm Saimir Tahiri ka folur sot për të ashtuquajturën pajisje përgjimi, për të cilën akuzohet nga Partia Demokratike se po përgjon disa zyrtarë të lartë të shtetit.
“Policia e Shtetit nuk disponon, nuk ka disponuar dhe nuk i lejohet të disponojë një pajisje përgjimi. Policia e Shtetit nuk ka punuar dhe nuk do të punojë me një pajisje përgjimi. Kjo nuk lejohet me ligj dhe unë jam në detyre për të bërë detyrën pa shkelur ligjin”, – tha Tahiri.
Ai bëri me dije në vijim se ka një trajnim të nënshkruar me një marrëveshje në vitin 2007 me partnerët dhe më konkretisht me Italinë. Tahiri u shpreh se do të vijohen të kryhen këto trajnime me të njëjtat pajisje dhe nuk bëhet fjalë për pajisje përgjimi, por për një pajisje normale në Policinë e Shtetit.
“Unë nuk jam në detyrë për të bërë atë që kanë bërë ata që kanë qenë më parë. Do të bëj gjithçka që është e mundur që Policia e Shtetit të jetë në gatishmëri për të luftuar krimin”, – u shpreh ministri.
Tahiri tha në vijim se “janë të ftuar të vijnë të asistojnë, të hetojnë, të shikojnë e të verifikojnë, nëse Policia e Shtetit thotë të vërtetën në këtë deklaratë apo nëse ne gënjen. Jemi tërësisht të hapur dhe mjafton që gjithçka të bëhet në mënyrë ligjore”.
“Policia e Shtetit nuk ka pasur, nuk ka dhe nuk do të ketë asnjë pajisje përgjimi” , – ripërforcoi deklaratën e tij ministri i Brendshëm Saimir Tahiri. /tesheshi.com/
