Me një lumturi të lexueshme në portret pasi u shpëtoi prangave, ish-ministri i Rendit, Saimir Tahiri kaloi një dyorësh në Prokurorinë e Krimeve të Rënda, si nisje e hetimit ndaj tij në gjendje jo-arresti.
“Dua të falenderoj prokurorët që morën parsysh kërkesën time për të pasur një hetim sa më të shpejtë në kohë, sa më të gjithanshëm dhe sa më objektiv. Me kërkesën time u paraqita për të dhënë shpjegimet e mia dhe për të shprehur gadishmërinë sot dhe kurdoherë, deri në fund me çdo mjet timin dhe disponibilitetin tim personal për t’iu përgjigjur çdo kërkesë të prokurorisë”, tha Tahiri para gazetarëve, pas daljes nga godina hijerëndë e Akuzës.
Ai nuk ka pranuar të bëjë me dije detaje të pyetje-përgjigjeve para prokurorëve, apo rreth rezultateve të kontrollit shtëpiak një ditë më parë, duke u mjaftuar me tezat parimore të tipit: “Unë them që debati politik lidhur me këtë histori duhet të mbyllet, unë betejën time e kam para drejtësisë dhe para shqiptarëve”. /tesheshi.com/
