Të shtunën rreth orës 17.00 në restorantin e Hotel Rogner hyri i pari deputeti i Partisë Socialiste të Shkodrës Tom Doshi. Pak minuta më pas atij iu bashkua ministri i Brendshëm Saimir Tahiri. Në një prej restoranteve në qendër të Tiranës janë takuar dy “armiq” të vjetër. Fjala “armiq” mund të jetë pak e rëndë, por është e njohur përplasja e tyre publike e pak muajve më parë kur Doshi adresoi kritika të forta ndaj ministrit Tahiri për mënyrën se si ai po drejtonte. Dreka mes tyre ka zgjatur rreth një orë dhe detaje nga ky takim nuk ka pasi çdo gjë është mbajtur konfidenciale nga si nga Ministri Tahiri ashtu edhe nga deputeti Doshi.
Ky i fundit u pyet nga abc news dhe tha se me ministrin ishte takuar për të diskutuar mbi situatën e rendit në qarkun e Shkodrës. Doshi nuk e qartësoi nëse në takim është diskutuar edhe për “përplasjen” e tij me kryeministrin Rama apo nëse kjo është një negociatë përpara mbledhjes së grupit parlamentar të ditës së hënë. Doshi ka thënë gjithashtu se do të jetë i pranishëm në mbledhjen e Grupit dhe se nëse do t’i jepet mundësia do të sqarojë kritikat e tij. Përsa i përket përjashtimit ai tha se, kjo mund të bëhet, por mandatin ia kanë dhënë qytetarët e Shkodrës dhe nuk mund t’ia heqë askush.
Që marrëdheniet e Doshit me Tahirin nuk ishin shumë miqësore e tregoi edhe deklarata e Ministrit në emisionin “Opninon” ku tha se “nuk është e shëndoshë të biesh në nivelin e akuzave banale dhe shpifjeve të Sali Berishës. Për më tepër kur këto akuza vijnë nga mazhoranca”.
Me Tom Doshin drekoi pas akuzave edhe deputeti Koço Kokëdhima në një përpjekje për të ndalur përplasjen mes tij dhe kreut të maxhorancës.
(lapsi.al(
