Kreu i Rendit, Saimir Tahiri ka reaguar ashpër ndaj vendimit të Presidentit për të mbledhur Këshillin e Sigurisë Kombëtare për çështjen “Balili”, pas një kërkese të kreut të Kuvendit, Ilir Meta. “Ky këshill nuk është mbledhur as kur Lazarati ishte aty”, tha Tahiri, duke nuhatur se e gjitha është një lojë politike me personazhe të caktuara. Qëndrimet e Tahirit u shprehën gjatë analizës së Policisë së Shtetit të zhvilluar paradite në Berat.
Aty, ministri i Rendit u përbetua për arrestimin së shpejti të të ashtëquajturit “Eskobar të Ballkanit”, por duke ofruar një risi. Nga njëjësi ai kaloi në shumës.
“Balili e Balilajt mund t’i kenë ende ditët e numëruara. Shumë shpejt do të jenë përpara drejtësisë”, tha Tahiri.
Mbetet të kuptohet se me “Balilajt”, ai ka nënkuptuar dhe pjesëtarë të tjerë të fisit të njohur delvinjot, apo ka qenë thjesht një metaforë për të dhënë të nënkuptuar se të tjerë si Klemend Balili, pra të ngjashëm me të, do dalin para drejtësisë. /tesheshi.com/
