Ministri i larguar Saimir Tahiri, e ka nisur me shumë ritëm e po aq protagonizëm verbal, fushatën paralektorale në Tiranë. Pasi shpërndau 200 legalizime në Zall Herr, ish-kreu i Redit, “halë në sy” e opozitës dhe e LSI-së, është ndalur në “Kombinatin” e tij, ku iu është përveshur të dyjave
“Po e kthejnë demokracinë kokë poshtë. Ca thonë qeveri teknike. Zgjedhjet bëhen për të drejtuar qeverinë. Këta duan qeverinë pastaj të bëjnë zgjedhjet.
Ata që deri dje ishin në pushtet, sot janë në çadër.
Dëgjojini ç’po thonë; Nuk dalim nga çadra përveçse po të na jepni qeverinë. Se shqipërinë e kanë trajtuar si plaçkë dje, e kështu e kërkojnë si plaçkë sot. Po shpikin kriza, kërkojnë shtyrjen e zgjedhjeve. Si mund të shtyhet dita e zgjedhjeve në emër të demokracisë?
Mos u lodhni me gjeagjëza, koalicioni ynë më i rëndësishëm është këtu, në çdo lagje, në çdo rrugë, në çdo derë, me çdo njeri, burra, gra, të rinj e të reja.
Koalicioni ynë është me shqiptarët për Shqipërinë që duam.
Me ata që duan shtet, drejtësi. Me ata që duan punë, duan paga, duan dinjitet. Koalicioni më i madh është ai i njerëzve që Shqipërinë e duan më të mirë, jo më të lirë. Shtetin e duan më të fortë, jo më të shpartalluar. Gjyqtarin të pakorruptuar, jo kokë e këmbë të korruptuar
Në 18 qershor PS do fitojë e pas 18 qershorit, Edi Rama do jetë kryeministër, për të çuar përpara punët që ende kemi për të bërë”, tha Tahiri, pa e përmendur pra askund koalicionin për “Shqipërinë Europiane” apo ndryshe aleancën strategjike me LSI-në. /tesheshi.com/
