Reforma në Drejtësi ka shkaktuar furtunë edhe në sallën e parlamentit. Në momentin që ministri i Brendshëm, Saimir Tahiri mori fjalën në foltoren e Kuvendit, ai ka shpërthyer në akuza ndaj opozitës të cilën e sulmoi se po pengon reformën. Madje, ai ka vendosur gishtin mbi ish-kryeministrin Berisha si shembull të frontit të shpifjes dhe pengesave që po dalin në rrugën e qeverisë për të reformuar gjyqësorin.
Në këto momente, deputetët e PD në shenjë kundërshtimi bllokuan foltoren e Kuvendit. Por, Tahiri ka vijuar:
“Kjo që ndodh në këtë sallë është shembulli më i mirë i Shqipërisë së fjalëve përballë asaj që ndodh jashtë këtyre mureve që është Shqipëria e punës, që ka të bëjë me njërëz të vërtetë. Ajo që deklaroni ju në këtë foltore nuk ka lidhje me realitetin”, theksoi Tahiri. Në momentin e hyrjes në sallë të Berishës, ai bën një deklaratë teatrale që ka “ndezur” palën opozitare:
“Mirëserdhe shembulli më ekzemplar i këtij parlamenti për shpifje, por bëmë baba të të ngjaj, thuaji djalit të përgjigjet në komisonin hetimor se çfarë ka bërë nën lëkurën tëndë. Shko jep llogari dhe lërë tët bir të japë llogari”, iu drejtua Tahiri Berishës.
Situata tensionohet edhe nga ndërhyrja e Jozefina Topallit, e cila është ndërprerë nga drejtuesja e seancës, Valentina Leskaj. /tesheshi.com/
