Ish-kandidati për kryetar të komunës së Drenasit, Xhavit Drenori, i cili së fundi lidhi koalicion parazgjedhor me Lëvizjen Vetëvendosje, ku edhe do jetë kandidat për deputet për zgjedhjet nacionale, i ka befasuar të gjithë me një vendim të marrë.
Për të mbuluar shpenzimet e fushatës 10-ditëshe, Drenori përmes rrjetit social Facebook ka publikuar disa fotografi të veturës së tij, të tipit VW Passat, duke kërkuar që të gjejë një blerës.
“Për të përballuar shpenzimet e fushatës zgjedhore kam vendosë me e shitë veturen time private VW Passat (viti i prodhimit 2006). Vetura është në gjendje shumë të rregullt teknike dhe është në pronësinë time personale edhe me dokumentacion. Nuk është në listen hipotekare. (Nuk e di nëse në Gjermani është vozitë vetëm nga një plakë , por në Kosovë ju garantoj që ka qënë në duar të shoferit shumë të kujdesshëm). Vetura shitet me çmim të arsyeshëm të tregut. Boll po me dhimbet, por kam mbetë pa alternative tjetër të mbulimit të shpenzimeve të fushatës. Për veturën në fjalë se bashku me bashkëshorten jemi ende kredi në bankë,” ka shkruar ai.
Drenori më tej ka njoftuar se shpenzimet e fushatës përfshijnë byrekë me jogurt, shpenzimet e lëvizjeve nëpër terren, si dhe mbushjet e telefonit për të gjithë vullnetarët që kanë shprehë gatishmërinë ta ndihmojnë, pastaj shpenzimet e vizitkartave, flyerave si dhe videospoteve promovuese për zgjedhje.
Kujtojmë se Drenori është asambleist në komunën e Drenasit, dhe në zgjedhjet e fundit për kryetar të kësaj komune kandidoi si i pavarur e u rendit i treti. /tesheshi.com/
