Emri i ish-ministri i Rendit Saimir Tahiri nga vitit 2013-2017 ka dalë në një dosje voluminoze përgjimesh të një grupi të fuqishëm trafiku lëndësh narkotike Shqipëri-Itali.
I pari që u distancua nga i besuari i tij dhe krahu i tij i djathtë, në qeveri e më pas në fushatën elektorale, ishte kryeministri Edi Rama.
Por shumëkush po e quan një distancim të vonuar këtë të Ramës, pasi ai ka pasur dijeni kohë më parë për përfshirjen e Tahirit në lidhjet me grupin kriminal të Habilajve, kushërinjtë e tij.
Atakimi i Tahirit për herë të parë bëri bashkë në një front PD-në dhe LSI-në, partitë opozitare. Ata kërkuar dorëheqjen e kryeministrit Rama, paralajmëruan protesta dhe madje kërkuan dhe një qeveri teknike të re, duke marrë shkas nga dosja “Tahiri”.
Burime pranë LSI-së, thanë për tesheshi.com se “i gjithë sulmi opozitar u fokusua tek kryeministri pasi ne jemi të sigurt se ai ka qenë në dijeni të përfshirjes së ministrit të tij dhe jo vetëm kaq, por ka fije që e lidhin Tahirin edhe me segmente të tjera të qeverisë së më parshme, të drejtuar po nga Rama”.
Por a po i ofron LSI-ja Tahirit një mbrojtje në këmbim të ofrimit të informacioneve për një sulmi të ri opozitar kundër Ramës? Burimet pranojnë se nuk është Tahiri që duhet të bëhet “kokë turku” siç po kërkon Rama, por është vetë Rama që duhet të mbajë përgjegjësi për këtë.
“Jemi të bindur se drejtuesi dhe përgjegjësi kryesor i lidhjeve të krimit e narkotrafiqeve me kupolën e lartë të shtetit dhe përfaqësuesi kryesor i narkoshtetit, interesave të oligarkisë dhe të korrupsionit është kryeministri Edi Rama”- thuhet në deklaratën e frontit PD-LSI, ku kërkohet dhe hetimi i lidhjeve të ministrave të tjerë të kesaj qeverie me trafiqet.
Duket pak e pabesueshme që LSI t’i ofrojë Tahirit strehë tani që të vetët e lanë të përballet me fatin e tij vetëm, por po aq e besueshme është në politikë përdorimi i çdo mjeti për të arritur qëllimin dhe që në këtë rast është dobësimi i Ramës.
Po të shikosh me vëmendje, dhe daljet publike të LSI-së nuk shigjetojnë më Tahirin, ministrin që kjo parti e ka akuzuar që kur ishte vetë në bashkëqeverisje dhe nga i cili kishte frikë se do u fuste deputetëve drogë në makina (Petrit Vasili paralajmëroi deputetët e tij për këtë).
Ish-ministri i Drejtësisë, Ylli Manjani u shpreh mbrëmë se: “Rama mos të kërkojë të vërtetën, sepse ai e di. Nuk mund të thotë që nuk e ka ditur. Është njësoj si atëherë, kur thuhej nuk di gjë Enveri, se këto gjëra i bën Mehmeti apo të tjerët. Rama duhet të dorëhiqet për t’i hapur rrugë të vërtetës. Cili prokuror mund të hetojë kryeministrin. Ai e kërcënon me vetting”.
Në përgjithësi linja e opozitës me rastin “Tahiri” ka qenë lënia në hije e këtij të fundit dhe fokusimi tek Rama, por akoma nuk dihet nëse ish-ministri i gjendur përballë akuzave do të kërkojë mbrotje politike tek kundërshtari i tij. /tesheshi.com/
