Nga Blendi Gashi
Ndihmësja e sekretarit amerikan për Evropë dhe Euro-Azi, Victoria Nuland, në fund të kësaj jave (10 korrik 2016) do ta vizitojë Kosovën, ku pritet të diskutojë me përfaqësuesit e pozitës dhe opozitës për zgjidhjen e çështjes së Demarkacionit me Malin e Zi, njëri nga kriteret e Komisionit Evropian për liberalizimin e vizave.
Zyrtarja amerikane Nuland, një vit më parë gjatë qëndrimit në Prishtinë pas takimeve që zhvilloi me politikanët kosovarë, arriti t’i bind ata që të votohet themelimi i Gjykatës së Speciale që do të trajtojë pretendimet për krime lufte në Kosovë.
Një vit më vonë, Nuland vjen sërish në Prishtinë, por këtë herë për një mision krejt tjetër, që të kërkoj137 nga politika kosovare të ratifikojnë marrëveshjen e Demarkacionit me Malin e Zi.
Zyrtarja amerikane sërish pritet të flasë me dyer të mbyllura me liderët institucionalë e të partive politike, për t’ua bërë të qartë se ratifikimi i Demarkacionit duhet të ndodhë.
Por shtrohet pyetja: a do ta përfillin partitë opozitare mesazhin që do të sjellë Nuland në Prishtinë?!
Sipas deklarimeve të deritanishme të përfaqësuesve opozitarë, një gjë e tillë nuk pritet të ndodhë, pasi opozita e ka kundërshtuar vlerësimin që ka bërë Departamenti Amerikan i Shtetit vitin e kaluar, me ç’rast vlerësoi se vija kufitare me Malin e Zi, është në përputhje me Kushtetutën e vitit 1974 dhe Pakon e Ahtisaarit.
Një pyetje tjetër që shtrohet përkitazi me vizitën e Nuland në Prishtinë është nëse zyrtarja amerikane mund të vijë me një mesazh konkretisht për partitë në pushtet PDK dhe LDK, konkretisht Kadri Veselin e Isa Mustafën që të rishikohet mundësia e rinegocimit të marrëveshjes në fjalë veç nëse sjellë sërish tensionim të situatës?
Kjo e fundit mund të jetë më pak e besueshme duke pasur parasysh vlerësimin e DASH për Demarkacionin por që nuk përjashtohet si mundësi të ndodh.
Por Nuland, gjatë vizitës së saj sigurisht nuk do të vije vetëm për Demarkacionin, por do të kërkojë nga drejtuesit e institucioneve të vendit edhe luftimin e korrupsionit, vazhdimin e dialogut me Serbinë etj.
Edhe kërkesa e fundit, pra për vazhdimin e bisedimeve me palën serbe bie në kundërshtim me qëndrimet e opozitës të cilat kërkojnë që bisedimet të ndalen pasi marrëveshjet nuk po zbatohen.
Megjithatë për të kuptuar qartë mesazhet e Nuland, saktësisht duhet pritur ditën e premte kur ajo viziton Prishtinën për të mësuar saktësisht se ç’rezultate do të sjell vizita e saj dhe a do të përfillen më pas kërkesat e SHBA-ve drejtuar politikanëve kosovarë. /tesheshi.com/
