Kryeministri Rama ka mbrojtur sërish këngën e fushatës së PS-së, një lloj tallavaje për të cilën ai pretendon se nuk është tallava.
“Nuk është tallava, është kombinim mes hip hop me muzikën tradicionale. E shijoj shumë edhe tallavanë. Tani këta hundëhollët e buzëhollët që kanë problem me tallavanë, ju siguroj që nuk e kanë dëgjuar kurrë Bethovenin nga fillimi deri në fund”, tha Rama, një lloj sfide kulturore që iu bën kritikëve të hitit pa pikë kualiteti artistik zgjedhur prej tij, duke bërë krahasimin dhe me këngën e parë fushatore, atë të 2003-it, “Tironën” me “West Side Family”, ku këndonte dhe vetë.
Por nuk është kusht që të dëgjosh Bethovenin për të mos e honepsur zgjedhjen e tij këtë fushatë.
Rama i përket brezit të viteve të arta në pikëpamje kulturore – ‘70-’80, që mjafton të kesh dëgjuar muzikën e asaj kohe, hite të pavdekshme, për ta patur të pamundur gëlltitjen e asaj që vetë e cilëson si “zhurmë” kur është fjala për muzikën e lokaleve.
Dhe këtu lind një pyetje: çfarë ka dëgjuar Rama kur ka qenë i ri?
A ishte ai i dhënë pas Batisti-t, Celentano-s, Cotugno-s Richi e Poveri-t apo Albano e Romina-s? A çmendej ai pas Beatles, Deep Purple, The Doors apo Rolling Stones?
Ja që kurrë s’është rrëfyer mbi pasionet e tij muzikore për ta kuptuar më mirë se me ç’shije muzikore është ngjizur në të ritë e tij. /tesheshi.com/
