Ndërsa përleshjet me forcat ruse vazhdojnë në të gjithë Ukrainën, evakuimi i civilëve nga zonat e afërta drejt kryeqytetit relativisht më të sigurt Kiev është duke u zhvilluar, raporton AA.
Civilët e evakuuar nga zonat përfshirë Buchu dhe Irpin, të cilët nuk kanë familje apo miq në Kiev, ose po kërkojnë strehim në shkolla ose po udhëtojnë në pjesën më të sigurt perëndimore të Ukrainës.
Shumë të moshuar strehohen në shkolla në Kiev, ku vullnetarët ofrojnë ushqim dhe gjëra të tjera të nevojshme.
Pak bagazh
Një prej tyre është shkolla nr. 115, në pjesën lindore të kryeqytetit ku ndodhen civilët e evakuuar. Rreth pesëdhjetë civilë, kryesisht të moshuar, po qëndrojnë këtu pasi u desh të largoheshin nga shtëpitë e tyre me pak bagazhe.
Olya Marchenko, një grua 73-vjeçare e evakuuar nga zona Pushcha-Vodytsya pranë Kievit, tha se qyteti i saj ishte granatuar.
“Prandaj, djali im dhe nipërit e mi dhe unë nuk kishim zgjidhje tjetër veçse të iknim dhe të kërkonim strehim në Kiev,” tha ajo.
Me lot në sy ajo tha se qyteti i saj ishte në shënjestër kur filloi lufta dhe se ata u strehuan në strehimore primitive.
“Ganatimet shkatërruan gjysmën e shtëpive në fshatin tim. Nuk kishte energji elektrike dhe gaz,” tha ajo.
Duke luftuar për të rrëfyer vështirësitë që pësoi, Marchenko i tha AA se nuk kishte njeri në Kiev dhe nuk kishte vend për të qëndruar.
Më shumë se 2.6 milionë njerëz u larguan
“Më duhej të largohesha nga shtëpia ku kalova jetën time në vetëm dy minuta”, shtoi ajo.
Marchenko, së bashku me miliona ukrainas të tjerë që duhej të linin shtëpitë e tyre, u larguan për shkak të luftës me Rusinë që shpërtheu më 24 shkurt.
Sipas Kombeve të Bashkuara (OKB), të paktën 564 civilë janë vrarë dhe 982 janë plagosur në Ukrainë. Agjencia e OKB-së për refugjatët tha se më shumë se 2.6 milionë njerëz nga Ukraina kishin ikur në vendet fqinje dhe rreth dy milionë ishin zhvendosur në Ukrainë. /tesheshi.com/
