Emri i Nikolas Gejxh, greko-amerikanit të konsideruar si me prirje antishqiptare për shkak të kauzës vorioepiriote që mbron, u përfol sërish ditët e fundit si i riardhur në Shqipëri, në një vizitë që mund të kishte lidhje me një protestë në Himarë për çështje pronash.
Edhe disa media greke kanë konfirmuar praninë e tij në jug, më saktë në Sarandë, por pa e detajuar arsyen e kësaj vizite. Tashmë thuhet se është larguar në drejtim të Greqisë.
Gejxh ishte në Shqipëri në fund të vitit 2002, në një vizitë që thuhet se ndryshoi shumë kursin e politikës, e ku lobisti me peshë në politikën amerikane nisi të punonte për riardhjen në pushtet të së djathtës me në krye Berishën. Por tej këtij serioziteti të çështjes, në atë vizitë, me emrin e tij ka ndodhur dhe një situatë komike.
Rudina Mneri, e njohur me pseudonimin “Paloma”, e cila punonte si për Goodmorning Albania e si për Fiks Fare në Top Channel, po priste së bashku me gazetarë të tjerë tek dera e Komunitetit Musliman për të zënë ndonjë politikan që do ishte aty për urim. Ishte një prej festave islame.
Dhe për një çast, ajo rend drejt derës ku po dilte një person flokë e mjekërbardhë, të cilit i drejtohet në emër duke e thirrur: “Zoti Gejxh…”. Por ky i fundit, që sigurisht nuk ishte aspak Zoti Gejxh, ia kthen: “Nuk jam zoti Gejxh mos vajzë, por Bardhyl Fico!”
Gazetarja që njihet për natyrën dhe karakterin e saj tralala, një lloj profili që e bënte tërheqës për audiencën, u tërhoq me të qeshura për gafën që kishte bërë, pa u ndalur së paku që të mendojë se nuk mund të ekzistontë asnjë arsye që një grek si Nikolas Gejxh të shkonte në Komunitetin Musliman.
Kujtojmë që Bardhyl Fico ka qenë i pari Sekretar për çështjet e Fesë, organizëm që më pas mori emrin Drejtoria e Kulteve. Ndërroi jetë vitin e kaluar. /tesheshi.com/
