Mbreti saudit Salman bin Abdulaziz ka pasur një operacion të suksesshëm të fshikëzës së tëmthit, u njoftua në Arabinë Saudite, vetëm disa ditë që kur u pranua në spital për shkak të inflamacionit, raporton AP.
Mbreti Salman, kujdestari i vendeve më të shenjta të Islamit, u pranua të hënën në spital për inflamacion të fshikëzës së tëmthit, sipas Reuters.
Kirurgët në spitalin “King Faisal” në kryeqytetin Riad, operuan mbretin, njoftoi agjensia shtetërore e lajmeve SPA, duke deklaruar se procedura ishte kryer në mënyrë laparoskopike, një procedurë me rrezik të ulët që zakonisht kërkon vetëm prerje të vogla dhe një aparat fotografik të vogël për të ndihmuar kirurgët të punojnë.
Mbreti 84-vjeçari Salman do të qëndrojë në spital për ca kohë për shërim dhe mbikëqyrje mjekësore, thotë agjensia, duke iu referuar njoftimit të zyrës mbretërore saudite.
Fuqitë absolute
Mbreti Salman ka qenë në pushtet që nga janari i vitit 2015, dhe ai konsiderohet monarku i fundit saudit nga brezi i vëllezërve të tij që kanë mbajtur pushtetin që nga vdekja e babait të tyre dhe themeluesit të Arabisë Saudite, Mbretit Abdulaziz.
Shëndeti i tij po monitorohet nga afër për shkak të autoritetit absolut që ai ka si kryetar i një prej prodhuesve më të mëdhenj të naftës në botë dhe një nga ekonomitë më të mëdha në botë.
Ai ka emëruar djalin e tij 34-vjeçar Mohamed bin Salman (MBS) si pasardhësin e tij. /tesheshi.com/
