Një përplasje verbale ndodhi në mbrëmje mes PD-së dhe Bashkisë së Tiranës, apo thënë ndryshe, mes Bashës dhe Erion Veliajt, që janë në fakt aspirantët për të pasuar Ramën në qeverisjen e vendit, e ku lavjerrësi politik duket se anon më tepër nga Veliaj.
Shkak është bërë një prani e Bashës në një prej godinave të Qytetit Studenti, ku ka planifikuar të takohet me disa studentë, por që nuk është lënë nga recepsionistja.
“Pasditen e sotme, kryetari i Partisë Demokratike, Lulzim Basha, së bashku me 4 shoqërues të tij, jo studentë, të pajisur me kamera për shoë-n e radhës, ka hyrë me dhunë në mjediset e brendshme të Godinës Nr. 4 në Qytetin Studenti. Bashkia e Tiranës dënon dhunën e ushtruar ndaj recepsionistes së Godinës nr. 4 në Qytetin Studenti nga qytetari Basha dhe tabori i tij i figurantëve, që prej disa ditësh kanë nisur të xhirojnë klipe nëpër Tiranë, si këngëtarë tallavaje, dhe dëshiron të informojë qytetarët se ka nisur menjëherë procedurat për denoncimin e tij para organeve ligjzbatuese si dhunues.
Bashkia e Tiranës sqaron se në mjediset e godinave të Qytetit Studenti mund të hyhet vetëm duke marrë një leje paraprake pranë Drejtorisë së Konvikteve, procedurë e cila ndiqet rigorozisht edhe nga familjarët e studentëve që banojnë në ato godina. Lulzim Basha nuk ka kërkuar dhe nuk ka marrë leje për të hyrë në Godinën nr.4”, thuhet në deklaratën e Bashkisë së Tiranës.
Nga ana tjetër, PD pretendon se një kryetar opozite nuk mund të ndalohet në këtë formë.
“Në asnjë vend të botës së lirë kryetari i opozitës nuk pengohet të vizitojë një ambient publik apo të takojë studente. Kjo mund të ndodhe në Korenë e Veriut. Ose në Tiranën e Erion Velisë, ku thjesht një vizite i tremb për vdekje se mos çjerr fasadën qe përcjell propaganda. Edi Rama, Erion Veliaj dhe gjithë të tjerët të jenë të sigurt se Lulzim Basha do të vijojë të takojë qytetarë çdo ditë. Askush nuk mund ta ndaloje misionin e opozitës”, thuhet në deklaratën e PD-së.
Më pas, komentet janë të natyrës politike. “Lulzim Basha, në sytë e qytetarëve të Tiranës si ish-kryetar i Bashkisë është një zero, i cili nuk do të bëhet kurrë Kryeministër me një CV të mbushur me zero në çdo punë të dhuruar nga partia, që po e shkatërron përditë. CV-në e mbushur me zero nuk do mund t’ia pastrojnë as videot e xhiruara nëpër Tiranë me figurantë të marrë borxh nga Forumi Rinor i PD-së”, thuhet nga Bashkia.
“Atëherë kur mendon se ka prekur limitet e qesharakes Erion Veliaj befason serish. Ketë herë, përtej fasadës që përcjell në videot dhe fotot e propagandës se tij, ndihet i frikësuar nga vizita qe kryetari i PD i bën disa të rinjve në dhomën e tyre në konvikt. Atë që s’e ka bere dot Ramiz Alia në grahmat e komunizmit në qytetin Studenti, mundohet ta realizoje pinjolli i rilindjes në krye të bashkisë moniste”, thuhet nga PD. /tesheshi.com/
