Dy herë kampionia e botës dhe fituesja e medaljes së artë olimpike në Lojrat Olimpike “Rio 2016”, Majlinda Kelmendi, do t’iu prijë edhe tre xhudistëve tjerë kosovarë Distria Krasniqi, Nora dhe Akil Gjakova, në Botërorin e xhudos “Budapest 2017”, i cili do të fillojë më 28 gusht.
Trajneri Driton Kuka, në intervistën për faqen zyrtare të Komitetit Olimpik të Kosovës “noc-kosovo.org”, ka folur për përgatitjet dhe pritshmëritë e garuesve.
Ai ka thënë se ekipi që drejton në tërësi ka pasur përgatitje serioze dhe janë të gatshëm për gara, pasi edhe gjendja shëndetësore e garuesve në përgjithësi është e mirë.
I pyetur për pritshmëritë, Kuka ka thënë se pret që së paku me një medalje të kthehet nga Budapesti
“Majlinda tanimë është favorite në çdo garë për medalje. Distria është ndër më të mirat në botë dhe gjasa për plasman, e edhe për medalje ka, por duhet që ajo ditën e garës të japë më shumë se 100 për qind të vetvetës për medalje që vlen edhe për Norën. Për Akilin do të ishte rezultat i madh nëse afrohet në tetë të parët”, ka thënë Kuka. /tesheshi.com/
