Shefi i UNMIK-ut, Zahir Tanin tha në një sesion të Këshillit të Sigurimit të Kombeve të Bashkuara në Nju Jork të mërkurën se vendimi i autoriteteve të Kosovës për të tarifuar me 10 përqind mallrat nga Serbia, si dhe miratimi i tri projektligjeve mbi forcat e sigurisë në Kosovë të rritur më tej tensionet mes Beogradit dhe Prishtinës.
“Miratimi i tre projektligjeve si dhe tarifat, kanë provokuar tensione të reja. Këto çështje duhen rregulluar me kujdes”, tha Tanin në Këshillin e Sigurimit, mbledhur për raportin e Sekretarit të Përgjithshëm Antonio Guterres, për punën e UNMIK-ut.
Ministri i jashtëm serb, Ivica Daçiç tha në një fjalim në Këshillin e Sigurimit të OKB-së se Serbia në mënyrë eksplicite është kundër akteve të njëanshme të Kosovës, mbi të gjitha, për themelimin e Ushtrisë dhe kërkoi që KS ta dënojë dhe mos ta mbështesë kërkesën e Kosovës për anëtarësim në Interpol dhe organizata të tjera ndërkombëtare.
Nga ana tjetër, ambasadorja e Kosovës në OKB, Vlora Çitaku i ka bërë thirrje komunitetit ndërkombëtar për të mbështetur anëtarësimin e Kosovës në Interpol, duke argumentuar se ata që pengojnë këtë anëtarësim ndihmojnë indirekt krimin e organizuar.
“Nuk mund të presim që të ketë luftë efektive kundër krimit ndërkombëtar nëse Kosova nuk është një anëtare e Interpolit. Kosovës nuk mund të vazhdojë të jetë një vrimë e zezë në Evropë”, tha ajo në sesionin e Këshillit të Sigurimit.
Çitaku shtoi se Policia e Kosovës i plotëson të gjitha kriteret për t’u bërë një partner i besueshëm në luftën kundër krimit ndërkombëtar.
Daçiç tha se Serbia do të investohet me përpjekje maksimale për të vazhduar dialogun dhe për të arritur një zgjidhje të qëndrueshme, e cila merr parasysh interesat e popullit serb dhe shqiptar.
Çitaku konfirmoi se dialogu është e vetmja mënyrë e mundshme, por se ai gjithnjë duhet të udhëhiqet nga e drejta e Kosovës për të ekzistuar si shtet. /tesheshi.com/
