Turneu i dytë Grand Slam i vitit, French Open, ka ofruar surprizat e para në nisje të tij.
Stan Wawrinka, zviceriani që e fitoi këtë turne në 2015-n dhe që ishte finalist vitin e shkuar, është eliminuar që në turin e parë.
Humbja 3-2 erdhi nga numri 67 i botës, spanjolli Guillermo Garcia-Lopez, në një ndeshje me shumë kthesa.
Rezultati do ta zbresë akoma më shumë në renditjen botërore 33-vjeçarin, i cili vuan nga problemet fizike, posaçërisht me gjurin, e që ka fituar vetëm një ndeshje në fushë me dhé të kuq para këtij aktiviteti, atë në Gjenevë, në pjesëmarrjen e tij të parë në një turne në tre muaj.
Një tjetër eliminim disi i papritur ishte ai i bjelloruses Viktoria Azarenka, një ish-numër një i botës në tenisin e femrave.
Dy herë kampione në Australian Open, Azarenka është e vetmja teniste bjelloruse që ka fituar një turne Grand Slam.
Ajo humbi 2-0 karshi çekes Katerina Siniakova po në turin e parë, çka do të thotë se tani ka vetëm dy ndeshje të fituara në Roland Garros në pesë vitet e fundit.
French Open, një turne në fusha me dhé të kuq, do të zgjasë për dy javë. /tesheshi.com/
