Vicente del Bosque ka befasuar jo pak sot kur ka bërë të ditur listën e përkohshme të 25 lojtarëve të thirrur në përfaqësuesen spanjolle për Euro 2016-tën, së cilës do t’i shkurtojë dhe dy futbollistë jo shumë ditë më vonë.
Fernando Torres, Diego Costa, Juan Mata, Sergi Roberto, Javi Martinez e Santi Cazorla janë mes të munguarve të mëdhenj.
Qe shpresuar shumë që Torres më së paku të thirrej në përfaqësuese, për formën e treguar në muajt e fundit me Atletikon e Madridit, por kjo nuk ka ndodhur.
Tre lojtarë të tjerë që luajnë në Premier Ligën angleze janë lënë jashtë. Diego Costa, që mbase paguan
çmimin për sjelljen e tij në fushë, Juan Mata, që asnjëherë nuk ka qenë i parapëlqyeri i Del Bosque-s, e që gjithashtu nuk ka patur paraqitje të vazhdueshme te Mançester Junajtedi, e Cazorla, i cili është kthyer prej një dëmtimi që e ka mbajtur për pesë muaj jashtë aktivitetit futbollistik.
Javi Martinez ka kaluar një sezon me probleme fizike me Bajernin e Mynihut, gjë që me sa duket ka sjellë dhe lënien e tij jashtë listës. Ai nuk është grumbulluar me kombëtaren spanjolle që dy vite të shkuara, ashtu si Torres.
I munguar do të jetë dhe Sergi Roberto i Barcelonës, që edhe pse i thirrur në përfaqësuese në fillim të vitit, nuk është përzgjedhur tani. Minutat e pakta te katalanasit janë faktori kryesor për këtë.
Në listën e trajnerit Del Bosque gjenden këta lojtarë:
Casillas, De Gea, Sergio Rico, Alba, Pique, Bartra, Ramos, Carvajal, Azpilicueta, Juanfran, Busquets, Iniesta, Silva, San Jose, Koke, Saul Niguez, Fabregas, Alcantara, Isco, Soriano, Pedro Rodriguez, Morata, Aduriz, Nolito, Lucas Vazquez.
Çekia, Kroacia dhe Turqia janë kundërshtarët e Spanjës në grupin D në Euro 2016. /tesheshi.com/
