Do duhet të kthehemi në vitin e largët 1998 për të hasur një fituese spanjolle në turneun e Roland Garros-it. Atëbotë, Arantxa Sanchez Vicario fitonte 2-1 në finale ndaj Monica Seles-it, duke siguruar trofeun e tretë në Grand Slemin francez.
Do të duheshin 18 vite që një teniste spanjolle ta fitonte sërish këtë turne. Numri katër në botë, Garbine Muguruza, vetëm 22-vjeçe, ka mposhtur bindshëm në finale tenisten më të mirë në botë, Serena Williams.
Finalja e luajtur këtë pasdite në Paris ka zgjatur një orë e 45 minuta, për t’u mbyllur 2-0 për Muguruza-n. Tenistja spanjolle ka bërë një paraqitje të njëtrajtshme, duke mos i dhënë mundësi për asnjë çast amerikanes të mbizotërojë në fushë, ashtu siç bën rëndom.
Setet janë mbyllur 7-5 dhe 6-4, mes një loje të ekuilibruar, por gjithmonë me epërsinë e spanjolles, qoftë në lojë, qoftë në aspektin psikologjik.
Kështu, Muguruza ka marrë hak ndaj Williams-it për atë finale të vitit të shkuar në Wimbledon, ku Serena fitonte 2-0 në finale.
Muguruza humbi vetëm një set në shtatë takimet që luajti në Roland Garros. E kjo ngjau në raundin e parë, në përballjen me sllovaken Schmiedlova, të fituar nga spanjolla 2-1.
E lindur në Karakas, Venezuelë, dhe banuese në Gjenevë, Muguruza ka fituar kështu Grand Slam-in e parë në karrierën e saj. /tesheshi.com/
