Ndërsa të gjitha mediat më të mëdha botërore paralajmëronin një tërheqje të Maria Sharapovës nga tenisi për shkak të problemeve shëndetësore, deklarata e 28-vjeçares ruse në orët e vona të së hënës ka qenë tronditëse, krejt e ndryshme nga pritshmëritë. Fituesja e pesë Grand Slam-eve ka pohuar me gojën e saj se ka rezultuar pozitive në testin e dopingut në turneun Australian Open në fillim të këtij viti.
Meldoniumi është substanca që ajo e ka marrë nga viti 2006 për arsye shëndetësore, e që është shtuar në listën e të ndaluarave në 1 janarin e 2016-ës pasi vendimi për këtë u miratua në mesin e shtatorit të vitit të shkuar.
“Dështova në test, dhe marr përgjegjësinë për këtë,” deklaroi Sharapova. “Për dhjetë vite më është dhënë nga doktori i familjes një medikament i quajtur mildronat, dhe pak ditë më parë, pasi kam marrë një letër nga ITF-ja (Federata Ndërkombëtare e Tenisit), mësova se ai kishte një emër tjetër, meldonium, që unë nuk e dija.”
Testi për doping i është bërë asaj më 26 janar, ditën kur humbi ndaj Serena Uilliamsit në çerekfinalet e Australian Open-it. Agjencia Botërore e Antidopingut (WADA) do të jepte më pas përgjigjen se ajo rezultonte pozitive, për shkak të përdorimit të meldoniumit.
“Eshtë shumë e rëndësishme të kuptoni se për dhjetë vite ky medikament nuk ishte në listën e ndaluar të WADA-s e se unë e kam marrë atë në mënyrë të ligjshme. Por rregullat ndryshuan më 1 janar, dhe meldoniumi u bë një substancë e ndaluar, që unë nuk e dija,” ka thënë ajo para gazetarëve.
Maria Sharapova do të jetë e pezulluar përkohësisht nga 12 marsi, deri në marrjen e një vendimi. Nike, kompania që e mbështet atë prej vitesh, ka lajmëruar po ashtu se e pezullon marrëdhënien me tenisten gjer në përfundim të hetimit të çështjes.
“Bëra një gabim të madh. E di se me këtë përballem me pasoja, dhe nuk dua ta mbyll karrierën time në këtë mënyrë. Shpresoj vërtet të më jepet një mundësi tjetër për ta luajtur këtë lojë.” Këto kanë qenë fjalët e Sharapovës, një prej tenisteve më të mira në botë të dhjetëvjeçarit të fundit. /tesheshi.com/
