Policia e Shtetit në bashkëpunim me Guardia di Finanza bënë të mundur ndalimin e një gomoneje me drogë në orët e vona të ditës së djeshme.
Operacioni ku morën pjesë Policia Kufitare, Delta Forcë, QNOD, Roja Bregdetare shqiptare, NUFROM dhe Guardia di Finanza në Bari, të koordinuar nga njësia ajrore e Frontex, u finalizua me ndalimin e një gomoneje, që tentoi të trafikonte një sasi të konsiderueshme lënde narkotike në drejtim të Italisë.
Në bordin e gomones janë kapur dhe arrestuar dy skafistë shqiptarë me inicialet L.R. vjeç 34 dhe H.D. vjeç 23.
Gjatë ndjekjes, policia bën me dije se dy trafikantët u përpoqën t’i shmangeshin disa herë patrulluesve dhe forcave policore që i ndiqnin duke kryer manovra të rrezikshme në det.
Në fund para se të ndaloheshin dy trafikantët hodhën lëndën narkotike në det, por janë rikuperuar rreth 600 kilogramë Marjiuanë.
Ndalimi i gomones u bë në ujërat territoriale italiane. /tesheshi.com/
