Fantastike ndeshja mes Valencias dhe Barcelonës. E mrekullueshme!
Një stadium që nuk ka pushuar për asnjë çast. Një Valencia që ka rikthyer në kujtesë ekipin e ditëve më të mira. Një Barcelonë që ka patur fat, ama shumë fat.
Në “Mestalla” ka përfunduar 2-3 sfida.
Në pjesën e parë është bërë protagonist gjyqtari me vendimet e tij. Messi shënon në minutën e 22-të, por Suarez është dukshëm në pozicion jashtë loje, duke patur rol në dërgimin e topit në rrjetë. Se si gjyqtari e quajti golin të vlefshëm, vetëm ai e di. Busquets shpëton minuta më vonë pa të kuqe, pasi gjyqtari tregohet sërish i mëshirshëm me të.
Munir, jo shumë kohë më parë në radhët e Barcelonës, i barazon shifrat në minutën e 52-të me një goditje me të majtën në hyrje të zonës së rreptësisë.
Katër minuta më pas Rodrigo i kalon vendasit në avantazh. Luis Suarez barazoi në minutën e 62-të, me lojën që u qetësua më tutje.
Në minutat e fundit Valencia i pati të tëra mundësitë të kalonte në epërsi, por dy-tre kundërsulme u çuan dëm. Dhe në fund, në mbarim të minutës së 92-të, kur arbitri po bëhej gati të sinjalizonte mbarimin e ndeshjes, tuniziani Abdennour, që deri atëherë kishte shkëlqyer, shkakton 11-metërsh.
Messi nuk gabon, dhe Barcelona fiton 2-3! /tesheshi.com/
