E trazuar ka vijuar mbrëmë ndeshja e vlefshme për javën e njëzet e dytë të kampionatit turk mes Gallatasarajit dhe Trabzonsporit, e zhvilluar në stadiumin “Türk Telekom Arena” në Stamboll.
Tradicionalisht e njohur si një prej përballjeve që ka ngahera tension më tepër seç duhet, ajo e ka kaluar cakun teksa një prej lojtarëve të Trabzonsporit i ka treguar gjyqtarit të ndeshjes, Deniz Ateş Bitnel, kartonin e kuq, në shenjë pakënaqësie të thellë për arbitrimin.
Tre gola, dy 11-metërsha dhe katër kartona të kuq. Ky është bilanci i kësaj sfide. Trabzonspori do të mbetej me shtatë lojtarë pas minutës së 87-të, kur Salih Dursun do të nxirrej jashtë për veprimin e tij.
Sfida do të niste mirë për miqtë, që kryesuan pas minutës së 25-të, kur edhe shënuan. Podolski e Selçuk İnan do ta kalonin epërsinë në anën e Gallatasarajit në pjesën e dytë me golat e tyre, por ndeshja do të merrte një kthesë tjetër me kartonat e kuq të njëpasnjëshëm.
Özer Hurmacı, Aykut Demir, Cavanda dhe Salih Dursun, që të katërt lojtarë të Trabzonsporit, do të nxirreshin jashtë njëri pas tjetrit. I fundit, Salih Dursun, u ndëshkua për atë veprim të rrallë, duke i treguar kartonin e kuq gjyqtarit.
“E pabesueshme, 11-metërshat e rregullt nuk i jep, ato që nuk janë i jep. Kartonat i përdor pa vend. Në të njëjtin pozicion, njërit ia jep, tjetrit nuk ia jep! Salih Dursun e mori kartonin e kuq të rënë në tokë dhe ia tregoi natyrshëm gjyqtarit.” Kështu e përshkruan një komentues i njohur i futbollit në Turqi atë çka ngjau mbrëmë.
2-1 përfundoi ky takim i zhurmshëm, por si Gallatasaraji dhe Trabzonspori po kalojnë një periudhë të errët në Superligën turke. /tesheshi.com/
