Korçarët e Skënderbeut dhe kryeqytetasit e Partizanit kanë treguar kujdes të madh të mos gabojnë në ndeshjet e javës së njëzet e pestë të Superligës, që janë zhvilluar sot.
Skënderbeu – Teuta është mbyllur 1-0, me golin e realizuar nga Latifi në minutën e 7-të. Në një stadium të qetë, me pak gjallëri, korçarët janë treguar pragmatikë në lojën e tyre, duke e administruar mjaft mirë lojën. Trepikëshi i sotëm vlen për të ruajtur distancën me katër pikë ndaj Partizanit në krye të klasifikimit.
Për Partizanin e vendit të dytë kishte një ndeshje më të vështirë në Ballsh, ndaj një Bylisi në rritje në javët e fundit. Megjithatë, miqtë fituan 0-2, me golat e Vilës dhe Trashit. Një fitore e çmueshme për Partizanin, që pas fitores në derbi ndaj Tiranës ka marrë më shumë zemër.
Krejt ndryshe ngjet me Tiranën, që ka harruar të fitojë. Në “Selman Stermasin” e boshatisur për shkak të braktisjes së skuadrës nga tifozët, Tirana nuk arrin të fitojë ndaj Flamurtarit. Rezultati 0-0 flet vetë për shterpësinë e lojës. Barazimi e zbret Tiranën në vend të pestë në renditje.
Vllaznia ka bërë një hap të rëndësishëm përpara në luftën për mbijetesë teksa ka mundur thellë, 0-4, Tërbunin në Pukë. Një fitore që vjen pas një serie rezultatesh negative, e që u jep shpresë shkodranëve.
Më i fituari i takimeve të ditës së sotme është Kukësi, që me fitoren 1-0 ndaj Laçit është ngjitur në vendin e tretë në klasifikimin e Superligës. Goli i Eminit në minutën e 76-të përcaktoi dhe fitoren e kuksianëve, që si objektiv kanë pikërisht pozitën ku gjenden aktualisht. /tesheshi.com/
