Nga Mensur Krasniqi
“8 gushti 2017”, do të futet në historinë e Shkupit si një datë e madhe futbollistike me zhvillimin e superkupës së Europës në këtë qytet. Si asnjëherë më parë, shkupjanët janë të privilegjuar që të ndjekin nga afër gjigandët e futbollit europian, Real Madridit dhe Manchester United, të cilët në orën 20:45 do të përballen mes tyre për një tjetër trofe të madh.
Dhe kjo ka bërë që Shkupi të kalojë një natë pa gjumë.
Tifozeritë e dy ekipeve kanë kaluar mbrëmjen jashtë, ku ajo angleze ka qenë më prezente në ambientet publike të kryeqytetit maqedonas.
Ndonëse ura e gurit ishte përcaktuar nga autoritetet si kufiri ndarës i tifozëve të Real Madrid, të cilët duhej të stacionoheshin nga pjesa e qendrës së Shkupit, për tifozët anglezë ishte rezervuar Çarshia e Vjetër. Mirëpo e vogël dukej ajo për t’i mbledhur me mijëra tifozë të klubit anglez të cilët u detyruan të kalojnë urën dhe prania e tyre dukej më e lartë nga spanjollët edhe në qendër të Shkupit.
Kjo me shumë gjasë, pasi që siç thonë mediat maqedonase, duke marrë parasysh gjendjen më të mirë ekonomike të anglezëve si popull, dhe çmimet e larta të hoteleve në Shkup, tifozët spanjollë si një popull më i “varfër” do të mbërrijnë në kryeqytetin e Maqedonisë gjatë ditës së sotshme.
Megjithëse tifozeria angleze shquhet për “huliganizëm”, çuditërisht nata e mbrëmshme kaloi pa asnjë incident, ku në fytyrat e tyre përkundrazi reflektonte një ndjenjë shoqëruese. Po ashtu, edhe shkupjanët të ngazëllyer nga atmosfera e bukur të cilën e krijonin tifozët mysafirë, e treguan karakterin mikpritës dhe vallëzonin së bashku me ta.
Qyteti i Shkupit, përveç tjerash kishte organizuar edhe lojëra të ndryshme argëtuese për qytetarët, me ç‘rast fituesve do t’ua mundësonin ta realizojnë ëndrrën që të përcjellin nga afër idhujt e tyre të futbollit duke siguruar biletë falas për në stadiumin “Filipi II Arena”. /tesheshi.com/
