11 tituj në dekadën e fundit, nga dy klubet spanjolle që kërkojnë të bëjnë për vete historinë europiane.
Barcelona dhe Sevilla do dalin në mejdan për të luftuar për titullin e “Superkampionit” të Europës. Ndeshja që fillon nga ora 20:45 në “Dinamo Arena” të Tbilisit mund të shkruajë historinë e këtyre dy gjigantëve spanjollë.
Me fitoren e mundshme Barcelona do barazonte Milanin sa i përket titujve të Superkupës së Europës. Blaugranasit kanë fituar gjithsej katër herë këtë trofe dhe për të pestin do përballen me Sevillan që luan edicionin e dytë në këtë trofe prestigjioz.
Për trajnerin e Sevillas, Unai Emery, Barcelona është favorite, por skuadra e tij do futet në lojë për të fituar. “Më duhet të pranoj që Barcelona është favorite, por dhe ne kemi opcionet tona, ndaj do futemi të fitojmë. Jemi në nivelin që kemi kërkuar, prandaj është një mundësi e mirë për ne”, tha tekniku i skuadrës andaluziane në konferencën për shtyp që organizohet para ndeshjes.
Ndërkohë tekniku i azulgranave, Luis Enrique duket më i relaksuar para ndeshjes, ndonëse e pranon pozitën e favoritit. “Nuk ka shumë rëndësi nëse jemi favorit. Ndeshja vjen në momentin kur ne kemi kapur formën e mirë. Shpresoj ta argëtojmë publikun me lojë të mirë dhe natyrisht t’i gëzojmë ata duke fituar trofeun”.
Ndeshja fillon nga ora 20:45 në “Dinamo Arena” të Tbilisit për të kërkuar fituesin e këtij edicioni të Superkupës së Europës. /tesheshi.com/
