Republikanët duket se e kanë përvijuar tashmë më së shumti kandidatin e tyre presidencial, e ai është pikërisht Donald Trump, njeriu që po i fiton një pas një votimet paraprake.
Edhe pse tek demokratët ka pak më tepër ekuilibër, edhe pse ndër ta lufta është më e fortë, peshorja e fitores anon nga ish-sekretarja amerikane e Shtetit, Hillary Clinton, që veç disa dështimeve të pjesshme, ka arritur të jetë mbi senatorin e Vermontit, Bernie Sanders.
Donald Trump fitoi në votimet e të ashtuquajturës “Super e Marta” në Alabama, Xhorxhia, Masaçusets, Tenesi, Virxhinia, Arkansas dhe Vermontin.
Rivali i tij më i afërt republikan, Ted Cruz, ia doli të fitojë vetëm në dy shtete, në Teksas dhe Oklahoma. Ndërsa Marco Rubio është ngushëlluar me një dalje në krye në Minesota, e cila qe dhe fitorja e parë për të.
Te demokratët, Hillary Clinton u shpall fituese në Alabama, Xhorxhia, Tenesi, Virxhinia, Arkansas, Teksas dhe Masaçusets.
Kundërshtari i vetëm i saj, Bernie Sanders, kryesoi në votimet në Vermont, Kolorado, Minesota dhe Oklahoma.
Rivalët e Donald Trump-it, edhe pse me fitore të vogla, u shfaqën të entuziazmuar e të kurajuar për të vijuar garën. Senatori i Floridës, Marco Rubio, i deklaroi CNN-it se ai do të bënte përpara e se nuk besonte që Donald Trump do ta fitonte nominimin.
“Kjo është lufta për zemrën dhe shpirtin e Partisë Republikane,” deklaroi ai.
Në frontin demokrat, Clinton e përshkroi kështu fitoren: “Ç’super e martë!”
Siç shpjegon CNN-i, fitoret e ish-sekretares amerikane të Shtetit në Jug dëshmojnë për fuqinë e saj mes votuesve afrikano-amerikanë, çka e bën tepër të vështirë që Sanders-i të triumfojë në nominim.
“Kjo fushatë nuk është thjesht për zgjedhjen e një presidenti,” do të thoshte ky i fundit. “Eshtë për transformimin e Amerikës,” qenë fjalët e Sanders-it në një manifestim në Vermont në orët e vona të së martës. /tesheshi.com/
