Sulmuesi i shkrimtarit Salman Rushdie tha se ai e respektonte Ayatollah Khomeinin, por nuk do të thoshte nëse sulmi ishte i frymëzuar nga fetvaja që ish-udhëheqësi suprem iranian lëshoi kundër shkrimtarit.
Sulmuesi, Hadi Matar, në një intervistë për gazetën amerikane New York Post, të botuar të mërkurën, tha se ai “lexoi disa faqe” të romanit të Rushdie “Vargjet Satanike” dhe se idenë për sulmin e mori pasi kishte parë në Twitter se autori do të ishte mysafir në Chautauqua në Neë York, raportoi Reuters.
Ishte për shkak të atij libri që Khomeini nxori një fetva në vitin 1988, duke bërë thirrje për “heqjen qafe” të Rushdie, një atesit blasfemist. Teherani ofroi një shpërblim prej 3 milionë dollarësh për këtë.
Rushdie ishte planifikuar të jepte një leksion në Chautauqua të premten e kaluar mbi lirinë artistike, por 24-vjeçari Matar e sulmoi me thikë.
Edhe pse gjendja e shkrimtarit 75-vjeçar me origjinë indiane mbetet kritike, ai u hoq nga reanimacioni dhe filloi të fliste.
“Unë e respektoj Ajatollahun. Unë mendoj se ai është një person i madh. Por vetëm kaq”, raporton Post fjalët e Matar.
Ndërsa për Rushdie the se nuk e pëlqen fare si njeri.
“Ai është një njeri që sulmon besimet”, theksoi sulmuesi, duke shtuar se kishte parë video të Rushdie në YouTube.
Ai hodhi poshtë pretendimet se ishte në kontakt me Gardën Revolucionare të Iranit.
Familja e Matar erdhi në SHBA nga Libani, duke u vendosur fillimisht në Kaliforni, përpara se prindërit e tij të divorcoheshin. Babai u kthye në Liban, dhe nëna u zhvendos në New Jersey, shkruan New York Times.
Nëna e Matar tha se ai u kthye nga një udhëtim në Lindjen e Mesme në 2018 si një njeri i ndryshuar dhe se ai ishte bërë gjithnjë e më i tërhequr. Pas sulmit ndaj Rushdie, nëna e mohoi djalin e saj dhe tha se nuk kishte folur me të që nga incidenti.
“Mbarova me të”, tha ajo për Times. /tesheshi.com/
