Nard Ndoka, kreu i PDK-së, i cili ishte i 5-ti në listën e kandidatëve demokratë për qarkun e Shkodrës është pozicionuar në krah të Lulzim Bashës në debatin e brendshëm në Partinë Demokratike.
Pas kritikave dhe akuzave në drejtim të Bashës nga ish-kryeparlamentarja Jozefina Topalli dhe ish-nënkryetari i PD-së, Astrit Patozi, Ndoka i sugjeron kundërshtarëve të kreut demokrat që të vazhdojnë rrugën e tyre, pasi nuk mund të kërkojnë llogari.
Madje me ironi, Ndoka shkruan se Basha nuk është “baba” i tyre, që i ka përkëdhelur për rastësi apo servilizëm të tejskajshëm.
Komenti i Nard Ndokës
Pse kërkojne “babën” të larguarit nga PD-ja?!
Ka disa personazhe në politikën shqiptare që kanë ecur, janë ngritur, përkëdhelur nga “baba”. Në fakt për rastësi apo servilizëm të tejskajshëm!
Sot, të larguar e të mënjanuar në “lirinë” e tyre, nuk po dinë të orientohen, të kuptojnë realitetin, të organizohen apo të jenë kontribues.
Tashmë në mërzi për mungesën e fronit, mosvëmendjen e “babës”, po kërkojnë sërish “babën”!
Ku është “baba”? Ku ka humbur Basha?, na pyesin ne të gjithëve!
Çfarë t’u themi?!
“Baba” nuk është më për Ju, mos u mërzisni! Zgjohuni dhe filloni rrugën Tuaj! Nëse do dini të ecni vetë, (pa “babën”), këtu jemi do ju shohim, vlerësojmë, respektojmë dhe pse jo, t’ju mbështesim në të drejtën Tuaj si një mundësi ringritjeje.
Por ju lutemi, mos kërkoni “babën” në fb, se nuk është dhe nuk mund të jete më për Ju!
Zgjohuni, kthjellohuni, bashkohuni dhe kontribuoni për të mirën Tuaj, të PD-së, të opozitës dhe të politikës shqiptare.
Unë ju vlerësoj dhe ju respektoj në të drejtën Tuaj, por ju them se kur jemi rrëzuar dikur nga Ju, nuk jemi ringritur kështu duke kërkuar “babën”!
Jozi, Astrit & co, Basha nuk është dhe nuk mund te jetë “babai” i Juaj, ai është kryetari i Juaj!
Zgjidhni një rrugë për të shkuar tek Ai, mos humbisni kohë me ‘llogje’ facebook-u, por ndërtoni të ardhmen Tuaj politike.
Unë ju mirëpres, ndryshe nga Ju që na penguat!
Faleminderit! /tesheshi.com/
