Kryetari i Drenasit, Ramiz Lladrovci, njëherësh kandidat për një mandat tjetër, është sulmuar të hënën në fshatin Terstenik.
Atij i është thyer vetura me gurë gjatë fushatës për zgjedhjet lokale.
Sulmin ndaj Lladrovcit e ka konfirmuar edhe policia. Zëdhënësja Florie Ahmeti, tha se lidhur me sulmin, që është cilësuar si kanosje dhe dëmtim i pronës, është arrestuar një person.
“Rasti është ka ndodhur mbrëmë rreth orës 22:00 në fshatin Tërstenik. Lidhur me këtë rast është arrestuar një i dyshuar dhe ndaj tij është hapur rasti si kanosje dhe dëmtim i pronës”, ka deklaruar Ahmeti.
Portali ynë ka tentuar të marrë një përgjigje nga Lladrovci por ai nuk i është përgjigjur thirrjeve telefonike.
Kujtojmë se brenda PDK-së ka pasur jo pak përplasje se kush duhet të nominohet si kandidat për kryetar nga kjo parti. Naim Bazaj ka qenë njeriu që ka kundërshtuar më së shumti rikandidimin e Lladrovcit dhe pasi nuk mori përkrahjen e qendrës që të jetë ai kandidat për kryetar, është parë haptas në fushatë duke mbështetur kandidatin e NISMA-s Isa Xhemajlaj. /tesheshi.com/
