Vazhdojnë sulmet fizike ndaj personave publik apo të afërmëve të tyre në Kosovë. Sot pasdite është rrahur bashkëshortja e ministrit në detyrë, Blerand Stavilecit, Vitore Metaj-Stavileci. Ngjarja ka ndodhur në lagjen Veterrnik të Prishtinës, ndërsa e dhunuara është dërguar për ndihmë mjekësore.
“Sot rreth orës 14:00, policia ka marrë informacionin se në lagjen Veterrnik në Prishtinë, një femër është sulmuar fizikisht nga persona të panjohur. Bëhet fjalë për shtetasen V. S., e cili ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës, (QKUK)”.
Ndërkohë, pas ekzaminimit të vendit të ngjarjes si dhe përfundimit të procedurave fillestare nga ana e policisë, puna hetimore është fokusuar në identifikimin e personave të dyshuar me qëllim kapjen e tyre, si dhe zbardhjen e të gjitha rrethanave që kanë të bëjnë me këtë ngjarje.
Disa ditë më parë janë sulmuar fizikisht edhe drejtori i burgjeve, Sokol Zogaj dhe gazetari Parim Olluri me të fejuarën. /tesheshi.com/
