Televizioni shtetëror egjiptian lajmëroi për plagosjen e dy turistëve pas një sulmi nga dy persona të paidentifikuar. Ngjarja ndodhi këtë të premte në qytetin bregdetar të Hurgadës në Detin e Kuq.
Dy sulmuesit i goditën me thika turistët pranë hotelit “Bella Vista”, për t’u vrarë më pas nga forcat e sigurisë. Të plagosur nga sulmi mbetën një gjerman dhe një daneze, por nuk dihet saktësisht shkalla e lëndimit të tyre.
Disi ndryshe ka qenë informacioni i bërë i ditur nga Ministria e Brendshme, që fliste për dy austriakë dhe një suedez të plagosur. Sipas saj, një prej mësymësve ishte një student prej Gizës, një rrethinë e Kajros.
Ngjarje të tilla, e posaçërisht rrëzimi i një avioni me mbi 200 pushues rusë në Gadishullin e Sinait jo shumë kohë më parë, e kanë goditur keqas turizmin e Egjiptit, njërin prej sektorëve më fitimprurës për ekonominë e vendit. /tesheshi.com/
