Ka qenë shumë i hidhur, si në vitet 1991-92 ish- ambasadori i Shteteve të Bashkuara në Tiranë, william Rajerson, në intervistën e dhënë për Zërin e Amerikës në gjuhën shqipe.
Njeriu që i shkatërroi karrierën që në fillimet e tij Fatos Nanos, ka sulmuar ashpër kreun e Kuvendit të Shqipërisë Ilir Meta.
Ndërsa në Tiranë ky i fundit festoi me bujë 25-vjetorin e parlamentarizmit dhe një media pranë tij e shpalli si kryetarin më të mirë të Kuvendit në 25 vjet, ambasadori Rajerson përkujtoi në Zërin e Amerikës 25-vjetorin e ardhjes së tij në Shqipëri, duke rezervuar një “dhuratë” të pakëndshme ndaj kreut të LSI-së, që po kalon kohë të një zenithi rilindjeje politike pas shkërmoqjes së imazhit përgjatë qeverisjes me Berishën.
Dhe duke folur për kulturën e rryshfetit dhe mungesën e një stabiliteti në Shqipëri, Rajerson tha
“Është për fat të keq shumë e vërtetë. Lexoj për shembull – nuk kam qenë atje, nuk e kam parë – se si një zyrtar shumë i lartë është i regjistruar në video duke marrë bakshish dhe ai vazhdon të jetë në pushtet. Një gjë e tillë duhet ta ishte arsye për ta larguar por nuk ka ndodhur dhe kjo është e tmerrshme”.
Edhe pse është në pension, një deklaratë e dhënë nga një ish-ambasador, aq më tepër Rajerson, ka peshën e tij dhe sipas të gjitha gjasave nuk përbën një qëndrim të izoluar.
Disa muaj më parë, Ilir Meta, u gjend në siklet pas një interviste mjaft kritike me akuza madje prej Zërit të Amerikës, ku ishte i ftuar në studion e Uashingtonit.
Në intervistën e tj dhënë Zërit të Amerikës, Rajerson kujtoi edhe kohën kur kishte mbërritur në Tiranë dhe me koshiencë mbajti një qëndrim të hapur për të rrëzuar PPSH-në nga pushteti.
Ai tha se për këtë kishte direktivë të fortë nga Uashingtoni madje e tha vetë James Baker-i gjatë vizitës së tij në Shqipëri.
“Ndoshta pozicionet e mia mund të mos kishin qenë aq të forta. Kur Sekretari Baker ishte në Tiranë, ne organizuam për të një takim me 10 disidentë në një sallë tek Hotel Dajti ku ishte një vapë e jashtëzakonshme. Dhe jam i sigurt që ishin vendosur dhjetra mikrofonë për të përgjuar, dhoma ime patjetër që përgjohej, për këtë isha i sigurt. Dhe Sekretari Baker tha: “Ju duhet të bashkoheni dhe të votoni për t’i hequr komunistët nga pushteti”. Dhe unë mendova: “Ky është urdhri për atë që duhet të bëj unë. Qeveria teknike do të jetë këtu për një farë kohe por është i domosdoshëm një fillim i ri”. Dhe për këtë arsye unë vendosa që të flas dhe siç i shkruajta më pas Sekretarit Baker, pasi u largova nga Shqipëria, unë mendova: “Ambasadorët shkojnë e vijnë. Nëse komunistët fitonin në 1992-in, ka shumë mundësi që ata do të thonin që Ryersoni duhet të largohet. Dhe do të kishte qenë në rregull. Ambasadorët janë të zëvendësushëm. Por përsa kohë të jem këtu, ta ngre zërin”, tha Rajerson.
Përgatiti: Ylli Pata – /tesheshi.com/
