Shtetet e Bashkuara të Amerikës dhe dy aleatët, Britania dhe Franca, ndërmorën sulme mbi objektivat ushtarakë të Sirisë këtë të shtunë; një aksion i pritur prej ditësh pas zhvillimeve të fundit.
Amerikanët përdorën raketat Tomahawk në mbi 100 goditjet në Siri, të lëshuara në një sërë objektivash.
Presidenti amerikan Donald Trump deklaroi gjatë një fjale të mbajtur me këtë rast se, “Një operacion i bashkuar me forcat e armatosura të Francës dhe të Mbretërisë së Bashkuar po kryhet tani. Ne i falënderojmë ato. Regjimi i Assad-it përdori armë kimike të shtunën e kaluar për të vrarë civilë të pafajshëm… Kjo masakër ishte një eskalim domethënës… Këto nuk janë veprime të një njeriu. Ato janë krime të një përbindëshi. Amerika nuk kërkon një prani të pakufizuar në Siri në asnjë rrethanë.
Për Trump-in, qëllimi i aksionit ushtarak është parandalimi i prodhimit, përhapjes dhe përdorimit të armëve kimike.
Theresa May, kryeministrja britanike, deklaroi se Perëndimi kishte provuar çdo mjet të mundshëm diplomatik për ta ndaluar Assad-in që të përdorë armë kimike, por se këto përpjekje ishin penguar nga Siria dhe Rusia.
“Ne nuk mund ta tolerojmë kthimin në normalitet të përdorimit të armëve kimike,” thuhet në reagimin e presidentit francez, Emmanuel Macron.
“Agresion barbar” e quajti media shtetërore siriane aksionin ushtarak të tre vendeve, duke paralajmëruar për pasoja të tij në botë.
Irani po ashtu reagoi ashpër ndaj sulmeve. Ministria e Jashtme e këtij vendi i cilësoi ato një shkelje flagrante të ligjit ndërkombëtar, si “shpërfillje të sovranitetit të Sirisë”.
Nga ana e tij, sekretari i përgjithshëm i OKB-së, Antonio Guterres, bëri thirrje për vetëpërmbajtje. Ai u kërkoi shteteve anëtare të OKB-së të tregojnë vetëpëmbajtje dhe të shmangin çdo akt që mund ta përkeqësojë situatën dhe t’i shtojë vuajtjet e popullit sirian.
Sa për reagimin rus, atë e pëmbledh ambasadori rus në SHBA, Anatoly Antonov, që në Twitter shkroi se po vihet në zbatim një skenar i parapërgatitur.
“Përsëri, ne po jemi të kërcënuar. Ne paralajmëruam se veprime të tilla nuk do të lihen pa pasoja. SHBA-ja, poseduesja e arsenalit më të madh të armëve kimike, nuk ka të drejtë morale t’i fajësojë vendet e tjera,” lexohet në reagimin e ambasadorit rus.
Sekretari i përgjithshëm i NATO-s, Jens Stoltenberg, u shpreh në mbështetje të sulmeve të SHBA-së, Britanisë dhe Francës: “Kjo do ta reduktojë aftësinë e regjimit për sulme të mëtejshme mbi popullin sirian me armë kimike.” /tesheshi.com/
