Policia e Kosovës ka njoftuar mëngjesin e sotëm se ka patur dy shpërthime në Sharpelje afër Jarinjes, pikës kufitare me Serbinë në Veri, por se nuk ka të lënduar dhe se nuk ka pasur dëme materiale.
Sipas deklaratës, dyshohet se shpërthimet janë shkaktuar nga mjete piroteknike pranë një makine policie. Policia dyshon se ato mjete shpërthyese janë hedhur “nga territori i Serbisë”.
“Shpërthimet kanë ndodhur pranë një veture policie, pasi policia ka qenë e fokusuar në parandalimin e kontrabandës së mallrave në atë zonë”, thuhet në deklaratë.
Ky është sulmi i pestë ndaj policisë në katër ditët e fundit në veri të Kosovës, ku jeton popullata shumicë serbe.
Ngjarja ka ndodhur në një pjesë që është afër territorit të Serbisë dhe ekziston dyshimi i bazuar se këto automjete janë shënjestruar nga territori i Serbisë.
Policia e Kosovës u sulmua edhe më 15 prill, siç konfirmoi ministri i Brendshëm i Kosovës Xhelal Sveçla në një konferencë të jashtëzakonshme për shtyp. Siç ka shpjeguar ai, sulmi ka ndodhur kur ekipi policor është nisur për të marrë turnin në pikën kufitare me Serbinë.
Ministri Svelça tha se “grupe të ndryshme kanë kryer katër sulme në zonë në tre ditët e fundit”.
Kryeministri i Kosovës, Albin Kurti, ka thënë më 15 prill se sulme të tilla nuk do ta ndalin luftën kundër korrupsionit dhe krimit të organizuar dhe se do të vazhdojnë të mbrojnë sundimin e ligjit.
Ai i bëri thirrje Serbisë që të dënojë dhe të distancohet nga “sulmet e dhunshme terroriste ndaj policies dhe policëve, disa prej të cilëve ishin serbë të Kosovës”.
Në lajme të tjera, një mision i KFOR-it i drejtuar nga NATO ka riafirmuar gatishmërinë e tij për të mbështetur Policinë e Kosovës, nëse nevojitet dhe kërkohet.
Sulmet ndaj Policisë së Kosovës janë dënuar edhe më herët nga Zyra e Bashkimit Evropian në Kosovë dhe Ambasada e SHBA-së në Prishtinë, duke theksuar se palët nuk duhet të përdorin retorikë që mund të rrisë tensionet.
Katër komuna në veri të Kosovës, Mitrovica Veriore, Leposaviqi, Zubin Potoku dhe Zveçani janë me shumicë serbe.
Policia e Kosovës tha në shkurt se kishte filluar mbylljen e disa rrugëve ilegale në Veri të cilat përdoreshin për kontrabandë mallrash. /tesheshi.com/
