Zyrtarë të lartë gjermanë kanë bërë thirrje sot për një kontroll më të rreptë të shitjes së armëve, pas të shtënave në Munih që morën jetën e nëntë personave dhe plagosjen 27 personave tjerë. Ministri i punëve të Brendshme të Gjermanisë paralajmëroi një rishikim të ligjit gjerman për armë.
“Duhet të vazhdojmë të bëjmë gjithçka që është e mundur për të kufizuar dhe kontrolluarnë mënyrë strikte qasjen ndaj kësaj arme vdekjeprurëse”, ka thënë zv/kancelari gjerman Sigmar Gabriel për grupin mediatik Funke Mediengrupe.
Gabriel, i cili është udhëheqës i socialdemokratëve, u shpreh se autoritetet gjermane janë duke hetuar se si është e mundur që gjermani 18-vjeçar me prejardhje iraniane ka pasur qasje deri te armët, duke pasur parasysh faktin se ai kishte probleme serioze psikologjike.
“Kontrolli i armëve është çështje shumë e rëndësishme”, tha Gabriel.
Njëkohësisht, ministri i punëve të brendshme Thomas de Maiziere, i cili është anëtar i demokristianëve të kancelares Merkel, ka thënë gjatë një interviste për të përditshmen “Bild”, se planifikon rishikimin e ligjit gjerman mbi armët dhe se do të kërkojë të bëjë përmirësime aty ku është e nevojshme.
Ai deklaroi se ligji gjerman në këtë pikë ka qenë edhe është mjaft strikt ndaj duhet të kuptojmë se si ka ardhur sulmuesi në posedim të armëve që ka përdorur. /tesheshi.com/
