Ministri i Brendshëm i Spanjës deklaroi për mediat se celula që ndërmorri sulmin në Barcelonë dhe Cambrils është shkatërruar.
Ndërkohë policia vijon kërkimet për Younes Abouyaaqoub, i cili dyshohet se ishte personi që drejtonte furgonin që sulmoi kalimtarët.
Sipas të dhënave zyrtare të policisë spanjolle, deri tani katër persona janë në arrest shtëpie, pesë u vranë në Cambrils dhe tre të tjerë janë identifikuar, mes të cilëve edhe Younès Abouyaaqoub.
Dy prej tyre mendohet se mund të kenë mbetur të vdekur në shpërthimin që ndodhi në Alcanar, ndërsa përpiqeshin të bënin një bombë artizanale.
Terroristët, që në Spanjë vranë 14 persona dhe plagosën 130 të tjerë, kishin planifikuar që me tre furgonë të mbushur plot eksplozivë të sulmonin pjesë të ndryshme të Barcelonës, përfshirë edhe katedralen Sagrada Familia.
Plani i tyre dështoi pasi në vendin ku mbanin gazin propan-butan, një natë para sulmit në Barcelonë, ndodhi një shpërthim i papritur.
Grupi terrorist ishte i përbërë nga 12 persona dhe ata kishin planifikuar të vrisnin sa më shumë njerëz në Barcelonë, transmetojnë mediat lokale.
Prokurorët thonë se grupi kishte planifikuar të hidhte në erë katedralen duke përdorur eksploziv plastik TATP, i cili po ashtu është gjetur në vendin e sulmit, shkruan “Daily Mail”.
Katedralja Sagrada Familia është pjesë e trashëgimisë kulturore të UNESCO-s dhe një nga vendet më të vizituar në Evropë. Ajo në vitin 2010 ishte vizituar edhe nga Papa Benedikt XVI. /tesheshi.com/
