Gjykata e Apelit e Kosovës, e ka ndërprerë masën e paraburgimit ndaj tre aktivistëve të Vetëvendosjes, Atdhe Arifi, Frashër Krasniqi dhe Egzon Haliti, të cilët do mbrohen në liri.
Këta të tre, se bashku më të akuzuarën Adea Batusha, po akuzohen nga ana e Prokurorisë Speciale për veprën penale “Kryerja e veprës penale terroriste” nga neni 136 paragrafi 1. lidhur më nenin 135 paragrafi 1, nën-paragrafi 1.7., e lidhur më nenin 31 të Kodit Penal të Republikës së Kosovës.
“Kolegji Penal i kësaj gjykate, duke vendosur lidhur më ankesën e Prokurorisë Speciale dhe ankesat e mbrojtësve të akuzuarve, të paraqitura kundër aktgjykimit të shkallës së parë, të hënën më 26.02.2018, vendosi edhe për çështjen e paraburgimit, ndaj të akuzuarve, dhe vlerësoj se tanimë kanë pushuar arsyet ligjore që ata të qëndrojnë në paraburgim”, thuhet në njoftimin e Gjykatës së Apelit.
Ky aktvendim ka të bëjë vetëm me ndërprerjen e masës së paraburgimit.
Gjykata, brenda afatit ligjor do të bëjë publike edhe vendimin e saj lidhur më ankesat e palëve kundër aktgjykimit.
Kujtojmë se Gjykata Themelore në Prishtinë, më 17 nëntor të vitit të kaluar dënoi me mbi 21 vjet burg katër aktivistët e VV-së për kryerje të veprës terroriste.
Atdhe Arifi u dënua me 6 vjet burg, Egzon Haliti 5 vjet, Frashër Krasniqi me 8 vjet burg, ndërsa, Adea Batusha me dy vjet burg. /tesheshi.com/
