Kur dy ditë më parë, gazeta më e madhe serbe Blic fliste për një varg trazirash në Ballkan, shumë analistë e morën për një krizë vere lajmesh.
Por qarqe të rëndësishme të shërbimeve sekrete të vendeve të NATO-s, e kanë marrë për një mesazh të caktuar nga ata që e financojnë median më të madhe të Beogradit, e që është Serbiagas, konsorciumi shtetër energjitik, i cili është i lidhur kokë e këmbë me Gazpromin rus, madje i ka atij një borxh që kap shifrat e 10 miliard dollarë.
Ndërkaq, ngjarja e ndodhur mbrëmë në Prishtinë ka alarmuar agjencitë e vendeve të NATO-s, të cilat po shikojnë zbatimin e një skenari vërtetë ogurzi.
Një grup i madh agjentësh të CIA-s kanë mbërritur prej ditësh në Ballkan në kuadër të vizitës në rajon të zv.presidentit amerikan, Joe Biden.
Zëvendësi i Obamas ka dy etapa shumë pikante të turit të tij: vizitën në Beograd, që tashmë është e konfirmuar, si dhe atë në Tiranë që pritet të konfirmohet së shpejti.
Mediat serbe kanë folur se ardhja e Biden ka si bazë dy gjëra: hyrjen e Serbisë në sistemin e vendeve që zbatojnë sanksione ndaj Rusisë, si dhe mbylljen e të ashtuquajturës Qendër Humanitare ruso-serbe në Nish, e cila nuk është gjë tjetër veçse bërthama e shërbimeve sekrete ruse në Ballkan.
Nga Sarajeva, aty ku është qendra e CIA-s për rajonin, ka nisur shpërndarja në terren e agjentëve që do të mbulojnë parandalimin e ndonjë incidenti të mundshëm.
Mungesa e Serbisë në sistemin e sanksioneve ndaj Rusisë e ka bërë Beogradin një urë për furnizimin me mallra të ndaluara për Moskën.
Pas 10 ditëve pritet të marrë votbesimin qeveria e re serbe e dalë nga zgjedhjet e 24 prillit, e cila është penguar nga qarqet pranë Moskës.
Nuk është rastësi që Vuçiç vizitën e parë jozyrtare pas fitimit të zgjedhjeve e bëri në Rusi ku takoi dhe Putinin, por detajet e saj mbeten një mister.
Edhe situata në Maqedoni e në Sanxhak shikohet si shumë eksplozive, ndërsa në Shqipëri është folur prej kohësh një rezistencë e elementëve anti-atlantikë në politikë dhe administratën shtetërore.
Pikërisht, pjesë e kësaj linjë është edhe sulmi ndaj përfaqësuesve të SHBA-së dhe BE-së në Tiranë që pritet të vazhdojë egërsisht edhe në ditët e ardhshme.
Vetë Rama, në fjalimin që bëri në Kuvend natën e miratimit të reformës në drejtësi, tha se do të ketë rezistencë edhe më të madhe ndaj zbatimit të reformës.
Ndërkaq, ngjarjet e mbrëmshme në Prishtinë shikohen si mjaft të rëndësishme për të analizuar rrezikun e destabilizimit.
“Kur këto ngjarje ndodhen në një vend me një numër të mëdha forcash të KFOR-it, imagjnoni se sa e rëndë është situata për vendet e tjera. Titulli i gazetës serbe se Ballkani po kthehet në një fuçi baruti, është një mesazh kuptimplotë që është i lexuar si i tillë nga agjencitë e inteligjencës”, tha për tesheshi.com një ekspert i çështjeve të sigurisë. /tesheshi.com/
