Nga Blendi Gashi
Kuvendi i Kosovës të enjten mbrëma u sulmua me mortajë dore nga dy persona, të cilët braktisën biçikletën me të cilën po lëviznin, e dogjën dhe ikën në këmbë në drejtim të panjohur.
Motivet e sulmit mbi ndërtesën institucionin ligjvënës nuk dihen ende, po aq sa edhe autorët e tij.
Shpërthimi ndodhi në kohën kur kishte lëvizje të qytetarëve në shëtitoren e qytetit të Prishtinës, por fatmirësisht nuk u lëndua asnjë person.
Policia e Kosovës ka bërë të ditur se në vendin e ngjarjes ka gjetur dëshmi relevante, në mesin e të cilave edhe një mjet për hedhjen e predhave, shishe të benzinës (koktej molotovi) dhe një motoçikletë të djegur jo larg nga vendi i ngjarjes.
Momentalisht pritet që dëshmitë nga vendi i ngjarjes të çojnë drejt kapjes së autorëve të sulmit mbi parlamentin.
Pas këtij sulmi erdhën reagime të shumta nga të gjitha partitë politike të cilat dënuan aktin, ashtu si edhe krerët e shtetit e ambasadorët e vendeve të huaja.
Kuvendi i Kosovës miratoi me shumicë votash deklaratën grupeve parlamentare, ku u dënua sulmin dhe u kërkua që institucionet e sigurisë të zbardhin sa më shpejt këtë akt qyqar.
Në kohën kur të gjithë reaguan, asnjë fjalë nuk e tha njeriu përgjegjës për sigurinë në vend. Bëhet fjalë për ministrin e Punëve të Brendshme Skënder Hyseni, i cili nuk u lodh as të raportonte para deputetëve në seancën e djeshme, e madje nuk mori fare pjesë në seancë.
Mos raportimi i tij për rastin në fjalë ngjalli reagime te shumë deputet si të partisë së tij LDK-së ashtu edhe të partisë koalicionit PDK-së, të cilët pohuan se ministri i Brendshëm nuk duhej të fshihej por të dilte para deputetëve dhe mbarë opinionit.
Edhe për opozitën dhe njohësit e fushës së sigurisë është e patolerueshme mos raportimi i ministrit Hyseni, për çka thonë se ky i fundit duhet të jap përgjegjësi.
Ish-kryekuvendari Jakup Krasniqi thotë se shteti i Kosovës po bëhet vend i që ndodh gjithçka dhe pavarësisht mos kryerjes së përgjegjësive, asnjë nga zyrtarët shtetërorë nuk jep përgjegjësi.
“Kush kujt nuk i jep llogari. Kjo qeveri në një vend normal ligjor, moti është dashur të dorëhiqej. Por në ambientin si i yni, dorëheqja konsiderohet kataklizëm e jo përgjegjësi morale!”, ka thënë ish kryekuvendari Krasniqi, për tesheshi.com, duke aluduar në atë se ministri Hyseni duhet të dorëhiqet.
Eksperti i çështjeve të sigurisë, Naim Maloku, ministrin Skënder Hyseni e quan të paaftë ta ushtrojë pozitën në të cilën është emëruar.
Ai e bën fajtor kreun e MPB-së për mos dhënien e informacioneve për sulmin që ndodhi ndaj kuvendit.
“Ministri Skender Hyseni nuk e ka marrë mundimin ta thotë një fjalë. Ministri i di të gjitha, si në rastin e Kumanovës, por që nuk dëshiron ta informon opinionin. Në këtë rast duhet me automatizëm të shkarkohet sepse po e mban opinionin të painformuar. Ministri nuk di asgjë dhe duhet shkarkuar për paaftësi në ushtrimin e përgjegjësive si ministër”, ka thënë Maloku, për tesheshi.com.
Kritika të ashpra ndaj ministrit Hyseni ka drejtuar edhe deputeti i PDK-së, Besim Beqaj gjatë ditës së djeshme në seancën plenare, ku tha se ministri është dashur të dalë me një deklaratë lidhur me rastin, pra të informojë zyrtarisht opinionin.
“Kuvendi brenda dhe jashtë ka shumë pajise që mund ta evidentonin një rast të tillë. Dikush duhet të jap përgjegjësi. S’po kuptoj me çfarë përgjegjësie sillen institucionet e sigurisë së vendit tonë”, deklaroi Beqaj.
Ndryshe, ndërtesa e kuvendit të Kosovës u sulmua para jo më shumë se gjashtë muajsh me koktej molotovi dhe as atëherë nuk u zbuluan motivet dhe as autorët e sulmit. /tesheshi.com/
