Prokuroria ka caktuar masën e ndalimit prej 48 orësh për shtetasin Fitim Thaçi, i dyshuar për sulmin e së premtes ndaj gazetarit Vehbi Kajtazi.
Gazmend Halilaj, avokati i Thaçit, ka thënë se nuk do të ankohen për vendimin pasi është fundjavë, por shpreson që të hënën i ndaluari të dalë para gjykatës dhe pret që në proçedurë të rregullt të lirohet.
Thaçi, në praninë e avokatit të tij, është dorëzuar të shtunën mbrëma në Stacionin Nr. 2 të policisë në Prishtinë.
Halilaj i ka thënë portalit Koha.net se klienti i tij, me ta kuptuar që është duke u ndjekur nga policia, është paraqitur vullnetarisht.
“Klienti im dhe Kajtazi nuk janë njohur më herët. Ai është dorëzuar në polici, nuk është kapur. Unë po pres edhe nga Prokuroria që do t´a lirojë. Ky vetë është dorëzuar, ndërsa viktima ka marrë lëndime të lehta, për këtë arsye”, ka deklaruar avokati Halilaj.
Ndërkaq Thaçi, në deklaratën e tij të shkurtër në praninë e avokatit, ka pranuar t´a ketë sulmuar gazetarin Kajtazi, mirëpo thotë se nuk e dinte se kush ishte personi të cilin e ka sulmuar. /tesheshi.com/
