Kandidati republikan në garën për Shtëpinë e Bardhë, Donald Trump ka tërhequr kredencialet për gazetën “Washington Post” që të mbulonte zyrtarisht fushatën e tij, për shkak se kandidati doli në përfundimin se mbulimi nga gazeta i garës zgjedhore ishte “i pasaktë”.
Trump shkroi në faqen e tij të Facebook: “Bazuar në mbulimin pabesueshmërisht të pasaktë të fushatës dhe raportimit të rekordeve të vendosura nga fushata Trump, ne tërheqim kredencialet e medias ndaj gazetës hipokrite dhe të pandershme Washington Post”.
Ai shkroi, gjithashtu, se vetë nuk është ndonjë fans i presidentit Barack Obama, mirëpo fajin e kishte “Washington Post” për një titull të së hënës ku sipas tij, thuhej se “Donald Trump lë të kuptohet se presidenti Obama është i përfshirë në masakrën e Orlandos”.
Titulli kryesor në fakt në edicionin e së hënës së gazetës shkruante: “Donald Trump duket se lidh presidentin Obama me masakrën e Orlandos”.
Trump tha në një intervistë për kanalin televiziv Fox Neës se kur vjen punë për të luftuar terrorizmin, presidenti “nuk e kuptoj ose e kutpn më mirë sesa mendojnë të gjithë”.
Zëdhënësja e gazetës “Washington Post”, Kristine Coratti Kelly theksoi në një email se titulli u ndryshua shpejt pas postimit të lajmit “për të reflektuar më mirë atë që Trump kishte deklaruar”. Ajo shtoi se një gjë e tillë ishte vendim i gazetës, pasi ekipi i fushatës së Trump nuk kishte kontaktuar gazetën asnjëherë”.
Me anë të një deklarate, redaktori i Post, Martin Baron tha se vendimi i Trump për të hequr kredencialet mediatike të gazetës, “nuk është asgjë më shumë sesa një refuzim i rolit të shtypit të lirë dhe të pavarur”.
“Kur mbulimi nuk korrespondon me atë që kandidati dëshiron që ne të themi, atëherë organizata e medias ndalohet. Post do të vazhdojë të mbulojë Donald Trump, ashtu si ka bërë gjatë gjithë kohës – ndershmërisht, me saktësi, me energji dhe pa u dridhur. Ne jemi krenarë për punën tonë dhe do të vazhdojmë”, tha ai.
Gazetarët nga e gjithë industria e medias reaguan ndaj ndalimit të Trump për Post-in, disa prej tyre duke sugjeruar se ishte një medalje nderi.
Shefja ekzekutive e agjencisë Associated Press, Kathleen Carroll, shkroi: “Publiku është i interesuar për garën për postin më të fuqishëm në planet. Publiku është i interesuar të dijë se çfarë thonë dhe bëjnë kandidatët dhe një mbulim i pavarur është pjesë e asaj që e mban publikun të informuar”.
“Themeluesit që hartuan kushtetutën amerikane mund shumë mirë të mos kenë qenë të kënaqur me historitë që shkruheshin rreth tyre, por ata e shenjtëruan të drejtën e një shtypi të lirë në amendamentin e parë, sidoqoftë”, shkroi Carroll.
Ekipi i fushatës së Trump ka hequr kredencialet për mbulimin e fushatës edhe për mjete të tjera informimi mes të cilave “Daily Beast”, “Huffington Post”, “Politico” dhe “Des Moines Register”.
Ekipi përsëriti vendosmërinë për të mos punuar me publikime që sipas tij, “e kanë vendosur nevojën për klikime mbi integritetin gazetaresk”.
Përgatiti: Juli Prifti – /tesheshi.com/
